ZPM in mipuite zah vanga tala an thil tum hnuklet turin MNF party leh MNF sawrkar an ngen

ZPM General Hqrs. chuan MNF MLA pariat (8) ten ZPM Legislature Party Leader, Lalduhoma MLA atanga bantir tura Assembly Speaker hnena hekna an thehlut chu pawi an tih thu leh mak an tih thu sawiin, mipuite zah vang tala an thil tum hi hnuklet turin MNF Party leh MNF sawrkar an ngen thu an sawi bawk.

Nimin a thuchhuah an siamah ZPM General Hqrs. chuan ram rorelna khawi hmunah pawh Opposition chak tak an awm hian rorelna a kal ngil phah thin nia tarlangin, sawrkar puitling chuan chu chu an thlahlel hle thin tih an sawi a. Chutih laiin sawrkar khalh ngil tuma rim tak leh tha-hnemngai taka House chhung leh pawna thawktu Opposition Leader, Lalduhoma thawhrimna te chhawr tangkai tum lova, sawrkar timualphotu ang zawnga ngai a, rorelna In atanga dahbo tumna chu Mizoram mipuite zahlohna leh ngaihnepna ah an ngaih thu an sawi a. Mipuite zah vang talin he an thil tum hi hnuklet leh turin MNF Party leh MNF sawrkar chu an ngen bawk.

ZPM thuchhuah chuan kum 1987 khan tuna rorellai, MNF Party ngei hian Assembly inthlanah Independent Ticket-a dingin sawrkar hial a lo siam tawh nia tarlangin, Dan Mit-a an tlinlohnate tu party mahin hnawk an tihsak loh thu leh tluang taka rorel thei turin duhsakna an hlan mai a nih thu an sawi a. An lo kal tawh dan anga rawn kal ve tho, mipui rawng an bawlpuite hnawk ti a, thuneihna hmanga a chhe thei ang bera an chunga rorel an tum chu pawi an tih thu an tarlang bawk.

Hetihlai hian nimin khan ZPM Thalai Hqrs. hruaitute chu an Office-ah inhmukhawmin MLA atanga Lalduhoma paihthlak tuma hma-lakna chungchang hi an sawiho a. He hunah hian ZPM Thalai President, Malsawmzuala chuan kan ram siamtha tura ZPM kalkawngah Pathian in thil tha leh lawmawm te, mihring ngaiha thil chhia leh harsatna ni a ngaih turte a dah ang tih ring tura chahin, “ZPM hian tlawm te in bul kan tan a, tuna dinhmun sang taka kan din ve theihna hi kan chakna leh thiltihtheihna avang a ni lova, 'Ka thlarau zawkin le' titu kan Pathian hnatawh vang liau liau a ni,” a ti bawk.

He hunah hian tawngtairualna hun pawh hmang nghalin Lalduhoma, MLA pawh a In ah an tlawh nghal bawk a ni.