Jal Jeevan Mission (JJM) hnuaia ISA hnathawh tur inhrilhhriatna Serchip-ah neih a ni

India ram chhunga thingtlanga chhungkaw tinte hnena Tui connection pekna tura hmalakna, Jal Jeevan Mission (JJM) hnuaia Implementation Support Agency (ISA) hnathawh dan tur chungchang sawihona chu niminpiah khan Serchhip-ah neih a ni.

PHE Serchhip WATSAN Division-a Sr. EE, Er. F. Lalsanglura Pisa-a he sawihona hunah hian PHE Department hotute bakah Serchhip Sub-Hqrs. YMA hruaitute telin Er. F. Lalsanglura chuan tunhmaa thingtlang khua te hnena Tui in tur pekna tura hmalakna, National Rural Drinking Water Programme (NRDWP) chu JJM hian thlak a nih thu leh Prime Minister Flagship Programme a nih thu a sawi a, JJM hnuaiah hian thingtlanga chhungkua zawng zawngten an In-a Tui an herhhaw theihna tura Tui Connection pêk vek chu a tum ber a nih thu leh kum 2024-ah chuan thingtlanga chhungkua zawng zawngten tui connection an neih vek theihna turin ruahmanna siam a nih thu a sawi.

PHE Sr. EE chuan tunah hian Serchhip Division hnuaia thingtlang khaw hrang hrangah pawh chhungkaw tinte hnena Tui pek hna hi thawh mek a nih thu sawiin, hemi rual hian Tui awm thatlohna khua ah te chuan Tui hnianghnar an neih theihna turin tuilak titha tura hmalak nghal zel a nih thu a sawi a, tun dinhmunah Hmuntha, Baktawng Chan In, Buhkangkawn, Sialsir, Khawlailung, Buangpui, Lungkawlh, Thinglian leh Hriangtlang-ah te chhungtinte hnena Tui Connection pek an ni tawh a, hei bakah hian Thentlang, Hmawngkawn, Phulmawi leh Vanchengte-ah te pawh chhungtinte hnenah Tui connection pekna turin Pipe fit hna thawh zawh tawh a ni a, sawrkar kum kal mek (2020-2021)-ah hian khaw 7 - Rullam, Neihloh, Tuichang, E. Bungtlang, Ngentiang, Hualtu leh Chekawn-ah te chhungkaw tin tui pek hna hi thawh leh a nih tur thu a a sawi bawk.

JJM kalpuina kawngah hian PHE Department leh Central YMA-in thawhhona tur an ziah bawhzuiin, Implementation Support Agency (ISA) atan hian YMA hman a ni dawn a, Serchhip WATSAN Division-ah pawh ISA atan hian Serchhip Sub-Hqrs. YMA hman an ni dawn a, Sub-Hqrs. YMA hnuaia Sanitation Committee chuan ISA Team turte a ruatchhuak a, hei hi PHE Department chuan a pawmpui tawh a, he hun hmannaah hian ISA hna chanpual turte inhrilhhriatna hun hman a nih bakah an hnathawh dan tur kalphung sawihona te an nei nghal a ni.

He hunah hian Samuel Lallawmzuala, District Coordinator chuan ISA hna chanpual tura duansa te a sawi a, JJM chungchang bakah tunhnaia Swachh Bharat Mission (Grameen) kaltlanga Prime Minister Award for Excellence in Public Administration 2020 dawng thei tura India ram puma District 10 thlan chhuah zingah Serchhip District a la tel thu sawiin, he Award dawng tur hian District Bawrhsapin presentation a pek tawh thu leh tunah hian sawrkar laipui lam atangin khaw mipuite hnenah telephone hmanga zawhna an zawh mek thu a sawi bawk.

Comments

Chhiar Hlawhte