Serchhip District-a khaw 2 ah inkharkhip kalpui a ni

Tunhnaia Mizoram-a COVID-19 hri kai hmuhchhuah te zingah anmahni hnaiha lo awm te an awm nia hriat a nih avangin Serchhip District chhunga khaw pahnih, North Vanlaiphai leh Khawlailung khua ah te nimin atang khan inkharkhipna kalpui a ni.

North Vanlaiphai atanga thu dawn danin kar kalta khan North Vanlaiphai khuaa cheng sawrkar Department pakhat-a thawk nupa chu Aizawl-ah kalin Inrinni khan North Vanlai-phai-ah hian an let leh a, Aizawl an zinna-a an hnathawh tur lo puitu zinga mi pakhat chu nizan hmasa khan COVID-19 hri a kai tih hmuhchhuah a nih avang leh Aizawl-a an lo inkawmhnaih avangin fimkhur thuah North Vanlaiphai-ah hian Total Lockdown hi nimin atang khan kalpui a ni a, hemi chhung hian heng mi te nena lo intlawh-pawh hnai te chu chhui nghal niin nizan lam khan chhui zawh theih an inbeisei thu leh Vawiin lamah chuan inkharkhip hlih theih beisei a ni bawk.

Hetihlai hian Khawlailung khua ah pawh nimin atang khan inkharkhipna hi kalpui a ni bawk a, thudawn danin Khawlailung khuaa Doctor awm mek pasal chu tunhnaiah Aizawl-a hri kai hmuhchhuah thar nen an lo inkawmhnaih avang leh amah hi kar kalta khan Khawlailung-ah hian a kal bawk si avangin fimkhur thu ah inkhar-khipna hi kalpui a ni a, sumdawnna hmun te khar a nih bakah PHC-a OPD pawh khar lailawk a ni a, Inrinni-a Khawlailung PHC-a inentir te chu pawnchhuak rihlo tura tih an ni a, mipuite tan hnathawh phal niin Aizawl leh Serchhip lama Maxi Cab Service tur erawh phal a ni lova, Bank leh Dam-dawi In te pawh tlawhpawh phal a ni rihlo bawk.