VC thar neih leh Ram theh tur rel a in nang chiah

 VC thar neih leh Ram theh tur rel a in nang chiah

- Commissioner Lalkiamlova

President, Clean Aizawl City

Kan hripui chimawm tak leng mek hian ava daih rei ta em! Khawvel huap pawhin mithiam tam takin he hripui hi Tam in zui ngei turah an ngai. A chhan sawi tam a ngai lo, kan India ram ngeiah pawh mi hausa farm-a thawktu tam tak hna thawk thei lovin mahni In lamah an haw a. Mill leh Factory tam takin hna thawktu an tlachham a. Agriculture tharchhuah nasa taka tlahniam tura chhut a ni. Engtiang takin nge keini ram kilkhawrte hi min khawih dawn kan sawi thei lo. Thing bul lam a chet chuan a ler chu nasa lehzualin a nghing thin. Bak hawlfung pawh a bul kan sawi chet hlek chuan a ler lam chu a lo firfiak thuai thuai tawh thin. Kan chawbel pui berte an Tam chuan keini, an zar zotu ho tan chuan thil huphurhawm tak a ni.

Thingtlang khaw tinah Village Council thar kan neih leh Lo tur atana ram theh rel hun a in nang chiah. Khaw tam tak, Mizo Lo neih dan pangngaia neite chuan September thla chhungin ram theh tur an rel fel ang. Khawtlang roreltu tharte hian Tam mai thei dinhmuna ding kan ni tih inhriaa ram theh tur rel a pawimawh ang. Tuna kan dinhmunah chuan Thingtlang khaw tam takah thlawhhma a hlat deuh chuan eizawnna dang nei lo pawhin ‘A hla em mai ka nei peih lo’ tih mai mai kan ching. Chu chu hriain khawtlanga lo neih bak eizawnna dang nei lo zawng zawngten Lo an neih ve theih dan ngaihtuah a pawimawh ang. Lam hnai ram tha a awm lo a nih pawhin feh kawng motor kal theiha siam tura tan lak a ngai anga, hemi thuah hian kan sawrkar ngei pawhin a theihna ang anga tan a lak ve a ngai a ni.

Ram awm lo ni si lova, eizawnna dang nei si lovin thlawhhma kan la lo ringawt mai thin hi thil dik a ni lo tih hria ila. Thawk mawh deuh chhung pawh Mizo takin khawtlangin kan khaichhuak thin a, chutichuan an kum chanve ei tal an lo thar ve thin a nih kha. Kumin chu chhungtin in tan i la teh ang u. Ration buhfai khulna tur dapchawpa nung hram hram kan nih lohna turin kan ven theih tawk thlawhhma, tin khat hmun emaw tal i la ang u. Thawk lova sawrkar tanpuina nghah ngawt mai hi ram mipuite tihdan phung tur a ni lo tih hria ila. Tlang ram loneitute hi Mizo rama eizawnna kawng hrang hrang zawhtute zinga rilru tha ber an ni ka ti thin. A chhan chu sawrkar puihna lovin kan chaw pui ber buh an thar bakah, thlai tam tak an tharin khawpui chawmtu an ni a. An thlawhhma neih tanpuina tura sawrkar puihna phutin nawrh an huaihawt ngai lova, vuivaina thu an thlen ngai hek lo. Anmahni tawkin an feh kawng laihna tur an ngaihtuah chhuak a, a chhia an siam a, sawrkar an phut ve ngai lo. 

Eizawnna kawng zawhtu Group dangte hi chu sawrkar tanpuina beisei, sawrkar puihna lova tih tum reng reng lo te pawh kan ang ka ti thin, leilet neitute thleng hian. Mahni tuilakna pipe chhia pawh repair tum lo, mahni feh kawng chhia pawh siam tum eih lo te kan tam ta mai. Tuizem, tui pipe, kawng siamna, a chi tur, a tiak phun tur, Vawk te no, Sangha chi tih vel besei deuh vek kan ni ta mai. Sawrkar pawh hian tanpuina a pek tam tawhzia ngaihtuaha an beisei ang hlawhtlinna an hmuh lohzia chhuta System dang ngaihtuah a hun ta hlein ka hria.