Faina Hapta hman dan tur rel

Kumin-a Serchhip khawpui-a Faina Hapta hman dan tur leh Mizoram khawpui fai inelna atana tan lak dan turte bakah India ram khawpui fai inelna, Swachh Survekshan, 2021 atana inbuatsaih dan tur relin nimin khan Serchhip District Sanitation Task Force chu an thukhawm.

He thutkhawm Serchhip DC’s Meeting Room-a neih hi an Chairman leh District Bawrhsap, Kumar Abhishek chuan kaihruaiin Member Secretary, Vanthangpuii, DUDO chuan Faina Hapta hman dan turte, Mizoram khawpui fai inelna kalpui dan tur te leh Swachh Survekshan 2021 kalpui dan turte kimchang taka a sawifiah hnuah hmalak zui dan tur sawiho a ni.

He sawihona a tel te hian Faina Hapta hawnna inkhawm hi sawrkarin punkhawm a phal sak chin chhungah hman relin Hapta hman chhung hian Serchhip, N. Vanlaiphai leh Thenzawl chhunga Village Council zawng zawngte chu pun-khawm phal zat zela insemdarha faina hnatlang nei vek tura tih a ni a. Faina Hapta puala faina-a inelna neiin Sawrkar pisa, School leh Institution, Village Council, Bazar leh Hospital & Restaurant inelna neiin endiktu tur ruat nghal an ni a. Village Council fai inelna bik hi Hapta atanga tanin nakum January thla thleng kalpui tur a ni a, endiktute pawhin he hun chhung hian vawi thum endikna an nei dawn a ni.

Khawpui fai inelna atana inbuatsaihna tur chi dangte pawh sawiho niin faina lama thawk tha mipa leh hmeichhia thlanchhuah tur chi Joint Village Council ten lo ngaihtuah se an ti a, District chhung khawpui pathumah chhungtin te chu bawlhhlawh bawm pathum (tawih thei, tawih theilo leh Hriselna atana hlauhawm) neih kalpui tan tha tiin nikum lamah Serchhip-ah Pilot Project anga kalpui chu kumin atang chuan a theih dan ang anga chhungtinin kalpui tum a ni a. Village Council tinte chu thlatin vawi khat tal faina hnatlang nei tura beisei an nih bakah khawpui fai inelna thuziak pakhat tal nei tura beisei an ni bawk.