Chanchin thar thenkhat :

LC 23 leh VC 8-ah inthlang

Aizawl District huamchhunga Local Council 23 leh Village Council 8 a inthlanna neih zawh takah MNF chu chak berin, Local Council 20 leh VC 3-ah hnehna an chang. Hri leng avanga a hun taka inthlan buatsaih theih lohnaah Mizoram State Election Commission chuan Zirtawpni khan inthlan a buatsaih a, SEC in Inrinni-a Local Council inthlan result a tihchhuah ah seat awm zawng zawng 157 atangin MNF chuan seat 103 la in, Local Council 20-ah an chak a, INC, ZPM leh Independet ten Local Council pakhat ah theuh hnehna an chang ve bawk. Village Council 8-a seat awm zawng zawng 36 atangin MNF chuan seat la hnem berin, seat 14 an la a, VC 3-ah an chak a, INC in seat 13 la in VC 2-ah an chak a, ZPM in seat 6 la in, Independent ten seat 4 an la bawk a, Independent-te VC pakhat ah an chak a, chak bik awm lohna VC 3 a awm bawk.

Heti hian Village Council leh Local Council inthlanna neih tura ruahman zingah Ram-hlun South Local Council chiah inthlan hmabak a awm tawh a ni.

Chhungkaw 485 te tanpui

Tlabung SDO (C) Office-a thawktu ten an chhinchhiah danin kum kalta a Khawthlang-tuipui lian tuartu, Tlabung leh a chhehvel khaw 15-a chhungkaw 485 te hnenah sawrkar chuan tanpuina Rs. 25,32,600/- a semchhuak a, heng zinga a tam zawk te hi Bank Account kaltlangin tanpuina hi pek an ni a, Account nei remchang lo chhungkaw 25 te chu a sumfai-a pek an ni. Heng tanpuina hi tuilian an tawrh dan enfiah a nih hnuah an tawrh dan a zira pek thin an ni.

Hri kai 19 enkawl dam an ni

Nimin tlai dar 5:00 thleng khan Mizoram ah COVID-19 hri kai hmuhchhuah mi 1093 awm tawhin nimin khan mi 19 te enkawl dam leh an ni a, heti hian Mizoram-a hri kai enkawl dam chu 732 tling tawhin hri kai hmuhchhuah atangin zaa 67.03 te chu enkawl dam an ni tawh a, tunah hian hri kai enkawllai 361 an la awm mek bawk.

Laboratory 11 awm tawh

Mizoram District hrang hranga TrueNat khawl bun thar te chu Indian Council of Medical Research (ICMR) in a pawm hnuah Mizoram-ah COVID-19 enfiahna chu hmun 11-ah a awm ta a, heng te hi District 9-a District Hospital leh Lunglei Civil Hospital-a TueNat khawl te bakah ZMC-a RT-PCR khawl te niin a vai hian sawrkar Laboratory vek a ni.

MNF in dawt a nih thu sawi

MNF Party chuan Inrinni khan thuchhuah siamin MPCC Media Department ten thu-chhuah an siamah Khawzawl, Tualte leh Riangtlei khuaa Congress leh ZPM Village Council member-te chu bialtu MLA leh Deputy Chief Minister in MNF party hruaitute a thlem tir-a an puhna chu dawt a nih thu leh an puhna chu dawt-a inpuhna a nih thu an sawi bawk.