Mizoram Assembly thutkhawm neih chu tluang taka zawhfel a ni ta

Mizoram Legislative Assembly 8-na thutkhawm vawi 6-na chu nimin tlai dar 4:13 khan tiamchin awm lova tihtawp a ni ta a, ni thum chhung thutkhawm neih a nih chhung hian Dan siamthatna tur Bill lut 8 te chu pawm vek niin lehkha pawimawh thahnem tak House Dawhkan-ah pharh a ni bawk.

Tunkar Thawhlehni atanga neih Mizoram Legislative Assembly thutkhawm hi nizan khan chhunzawm leh niin zawhfel a ni a, nimin tlai-a thutkhawm zawhfel a nih hma hian Speaker, Lalrinliana Sailo chuan COVID-19 hri leng karah Assembly thutkhawm tluang taka zawh a ni chu lawmawm a tih thu a sawi a, State dang nena kahikhin in Mizoram chu an vannei a, boruak muanawm tak hnuaia Session an nei thin a, he thil duhawm tak hi vawngnung zel ni se a duh tih a sawi a, Member-te inpawhna a lang a, thahnemngaihna avangin han inhnial deuh bap bap thin mah se hlim taka an nui tlang leh thin chu a lawm hle tih a sawi bawk.

Speaker chuan Session neih chhunga venhimhna thawktu Police bakah P&E, PHE leh a bikin, Health Department-in felfai leh inpe zo taka hri laka him nan theihtawp an chhuah avangin lawmthu a hrilh a, Assembly Secretariat-a thawktu te pawh fimkhur tak chunga theihtawp an chhuah avanga lawmthu a hrilh hnuah he thutkhawm hi tiamchin awm lovin a titawp zui ta a ni.

Assembly Session neih zawh takah hian House-a chhan chi zawhna, Starred Question 239 dawn niin, chung zinga 237 chu pawm a ni a. Starred Question dawn atang hian House-a chhan turin List of Bussiness-ah zawhna 60 dah a ni a, chung zinga 8 chu House-ah chhan hman a ni a, chhan hman loh 52 a awm a. Zawhna chhanna dawn loh 5 a awm bawk. Ziaka chhan chi zawhna, Unstarred Question 58 dawn chu pawm vek a ni a, Starred question atanga Unstarred Question-a leh 157 a awm a, zawhna chhanna dawn loh 3 a awm bawk a. House Dawhkan-ah Report 5 pharhin lehkha pawimawh 16 pharh a ni a, Dan siamthatna Bill 8 lut chu a vaiin pawm vek a ni.

Assembly thutkhawm tawp ni, nimin khan Sawrkar Dan hman lai siamthatna Bill 3 putluh te chu pawm tlan a ni a. Nimin a Bill pawm tak te hi Chief Minister, Zoramthanga putluh 'The Mizo-ram Fiscal Responsibility and Budget Management (Amendment) Bill, 2020' bakah Minister TJ. Lalnun-tluanga putluh 'The Court Fees (Mizoram Amendment) Bill, 2020' leh 'The Mizoram Salaries, Allowances and Pension of Members of the Legislative Assembly (Eight Amendment) Bill, 2020' tih te a ni.

Comments

Chhiar Hlawhte