Ei tur-a State kan intodelh ngaih pawimawh hmasak berna rilru pu turin CM in chah

Chief Minister, Zoramthanga chuan ‘Ei tur-a State kan intodelh chu kan ngai pawimawh hmasa ber tur a ni’ tih rilru ah pu reng chungin theihtawp chhuah a, ram tan thahnemngai taka hma la chhunzawm zel turin FOCUS member te chu a chah.

Chief Minister hian nimin khan Fostering Climate Resilient Upland Farming System in the North East (FOCUS) hruaitute kawmin an hmalakna leh kal zel dan tur a sawipuina ah he thu hi a sawi a. FOCUS hi United Nations Agency pakhat, International Fund for Agricultural Development (IFAD) hnuaia project niin, sik leh sa inthlak nasa (Global warming) leh Climate Change khawvelin a tawn mek hrula hmasawnna hna thawhna tura ruahman a ni. Sik leh sa inthlak danglam nasain kan eizawnna ber thlai thar leh tlangram lo neih a tihbuai chhoh mekah loneitute kawng kawhhmuh a, Technical Guidance pe turin FOCUS hi din a ni a. June 28, 2017 khan Mizoram sawrkar leh IFAD Project Design Completion Mission te chuan sawihona nei tanin, January 25, 2018 khan Project Agreement ziah a ni a. Mizoram-a District 4 (Champhai, Kolasib, Serchhip leh Mamit) huamin, khaw 272 an awm mek a ni.

FOCUS project hian a tum ber chu thingtlang loneih-a eizawng chhungkaw 64,500 ten thlai hlawk zawka an tharchhuah theihna tura tih hmasawn leh kumtin lo hal avanga sik leh sa inthlak danglam nasa lutuk tih ziaawm a ni a. Zawi zawia tlangram Lo vah leh Lo hal kalsan a, sik leh sa mil a thlai kumhlun hmanga Lo neitute sum dehchhuah tihpun a tum a ni. He Project hi hlawm 3-a then a ni a, chung te chu - thingtlang Lo neih tih hmasawn, man man zawka ran leh thlai tharchhuahte dehral theihna tura ruahmanna siam leh Project Management leh thiamthil inzirtirna te a ni.

IFAD atangin FOCUS Project atan hian Loan, US dollar maktaduai 35.30 ruahman a ni a. FOCUS Project hian Agriculture, Horticulture, Animal Husbandry & Veterinary Department leh Land Resources, Soil and Water Conservation Department-te a huam a. Agriculture Department chu Nodal Department a ni. Chief Secretary kaihhruaina hnuaiah Governing Council awmin, Agriculture Commissioner & Secretary chu Co-Chairman a ni a. Member-ah AH & Vety, LR,S&WC, Planning, Finance, RD&PR leh Revenue Department Secretary te, PCCF leh District pali (4) DC te an ni a. SPD, FOCUS-Mizoram chu Member Secretary a ni.