COVID-19 hri kai te hnawmhnawk senghawi dan tur Minister hovin sawiho a ni

Nimin khan Health Minister, Dr. R. Lalthangliana hovin COVID-19 hri kaite hnawmhnawk (Medical Waste) senghawi dan tur leh Mizoram pawn atanga lo haw Home Quarantine-te awmdan tur sawiho a ni a, he hunah hian sawrkar hotute leh tlawmngai pawl leh Kohhran bakah Doctor pawl aiawh leh damdawi In neitute pawh an tel a ni.

SAD Conference Hall-a he thutkhawm neih ah hian Health Minister chuan Aizawl Municipal Corporation (AMC)-in COVID-19 dona kawnga an hmalakna fakawm a tih thu sawiin, theihtawp chhuaha, mipuite him nana AMC sum kawng hrang hrangah an hmang te, chhuanchhama mipuite an awmlohna tur leh kan himna tura AMC Councillorte kaltlanga cheng nuai 95 lai an sengso tawh chu lawmawm a tih thu a sawi bawk.

He sawihona hunah hian COVID-19 hri kaite enkawlna hmun (CCC) leh Home Isolation atanga bawlhhlawh leh hnawmhnawk senghawi chungchangah Aizawl Municipal Corporation hotute chuan tun dinhmunah Quarantine Centre hrang hranga an hnawmhnawkte an senghawi mek tih an sawi a, CCC leh Home Isolation a awm mekte hnawmhnawk senghawi chungchangah thawktu indaihlohna awm tho mahse, heng hnawmhnawk te a him tawk leh tawk loh thu ah fimkhur thiam a har bawk si avangin, heng hnawmhnawkte hi sawrkar thuneitute lamin a senghawi dan tur an ruahman theih chuan a phum bo kawngah ruahmanna an siam theih thu leh lo buaipui vek an inhuam thu an sawi a, rawtna leh ngaihdan hrang hrang sawiho niin, Medical waste te hi mithiamte chuan Sodium Hypochloride hmanga uluk taka chiah a nih a fun that a nih chuan bawlhhlawh paihtute tan pawh a him tawk a ni tih an sawi a, Health Minister chuan uluk deuha ngaihtuahna sen ngai a nih avangin a rang thei ang bera hma lo lak chhun-zawm a nih tur thu an sawi bawk.

Hei bakah hian Mizoram pawn atanga Mizoram-a lo lut, mPASS kaltlanga Home Quarantine phalsak te zawm tur leh an Sample Test dan tur bakah In lama inkhunghran chhunga an inenkawl dan tur ruahmanna duan lawk chu uluk takin thlirho bawk a, Lengpui Airport leh Screening Point hrang hrang atanga lo lut, In lama inkhung-hran phalsakte leh Quarantine Centre a awm turte zawm tur chi hrang hrang ruahmanna hi chip-chiar taka sawiho niin rawtna awm belhte leh siamrem ngaite sawiho a nih hnuah siam that a zawm nghal theih tura peihfel tum a ni.