Latest News

Chanchin thar thenkhat :

 Champhai DC in tlawh

Champhai District Bawrhsap, Maria CT. Zuali chuan nimin khan an District chhunga Tual-cheng, Lungphunlian leh Hnahlan khua te tlawhin khawtlang hruaitute nen inkawmhona hun an neih bakah khawtlang hmasawnna tura hmachhawp leh hmalak dan turte a sawipui a. Bawrhsap chuan an District chhung khaw hrang hrangte a theih anga tlawhchhuah vek a tum thu sawiin, MNREGS, FOCUS leh Sawrkar Scheme dang dangte hmanga hmasawnna tluantling leh chhawr nahawm tak siam anih theihna tura hmalak tum anih thu a sawi bawk a. MNREGS kaltlangin khaw tin atanga chawikan ngai zual thlanchhuah chhungkaw 5 theuh te thlanga eizawnna ngelnghet an neih theihna tura chhawmdawlna leh kaihhruaina pek tum anih thu sawiin, hmasawnna rualkhai mitinte thleng pha siam tum a ni, a ti bawk.


MZP Mamit in lawmthu sawi

Mizo Zirlai Pawl (MZP) Hqrs. Mamit chuan Govt. Mamit College-ah zirlai ten Geography Subject an zir theihna tura hma an lakna ah a hlawh-tlinna hmua Govt. Mamit College-a Geography Subject zirna dah a ni ta chu lawmawm an tih thu thuchhuah siamin an tarlang a. Hemi atana hma latu Mamit bialtu MLA bakah he College Principal leh thawktute chungah lawmthu an sawi a. Mamit District chhunga Zirlai, Geography Subject la duh te chu Govt. Mamit College ah admission ti theuh turin an ngen nghal bawk.


Khawtlang in In sak sak

Khawzawl District chhunga awm, Chalrang khua chuan an khua a chhungkaw pakhat, nupa rek-a khawsa, kum 70 chuanga upa tawh te chenna In chu Branch YMA te kaihhruaina hnuaiah tunkar Thawhlehni atang khan an sak sak a, In hi a chhut lei ring-a sak niin Assam Type a sak a ni a, a dung ft. 24 leh a vang ft. 12-a zau-a sak niin bialtu MLA leh Deputy Chief Minister, Tawnluia chuan In chung tur Rangva a tum sak a, In sakna bungraw dang te hi mi tlawmngai ten an tum sak bawk a ni.


Party 2 te inbe leh dawn

Mizoram-a Political Party 2- MPC leh PRISM Party te chu party pakhat-a inchhunfin tumin an indawr mek a, Vawiin hian Party pahnih aiawhte hi inbe lehin Party pakhata inchhunfinna tur hun leh hmun ruahman leh tul dangte ngaihtuaha thlirhona neih a ni ang. Hemi hmalama Party pahnih aiawhte inbia chuan Party hming, Constitution leh Symbol chungchangah leh Party hruaitu turah te harsatna nei lovin inremna an siam tawh tih an sawi a. He Party thar ah hian Zoram siamthat duhtu zawng zawng te, Zoram dung leh vanga khawsa leh rampawn a awmte pawh tel turin an sawm nghal bawk.


Opp. MLA enhran duhlo

Mizoram Pradesh Congress Committee (MPCC) chuan Mizoram-a COVID-19 hri leng dona kawngah sawrkar tha tichak tumin nasa takin venpui hna an thawk tih sawiin, he hripui leng karah hian Opposition Party an nih anga an tih tur te tiin Sawrkar a theih ang anga thawhpui a, a chaklohna lai tihchak tumin hma an la reng tih an sawi a. Hripui dona kawngah sawrkar chu Opposition MLA-te en hrang tawh lo tura an duh thu sawiin, an MLA leh MP bakah an party hruaitu ten hri leng dona kawnga hma an lakna hrang hrangte an tarlang bawk.

Comments

Popular News (Last 30 Days)