COVID-19 doletna atan ‘Self-Reliant Mizoram Mission’ kalpui a tul - MP, Rajya Sabha

Mizoram Rajya Sabha MP, K. Vanlalvena chuan COVID-19 hri leng avangin ‘Self-Reliant Mizoram Mission’ kalpui tul a tih thu sawiin, a taka tih hlawhtlin a nih theih nan Mizoram-a Bank zawng zawngte chu mipuite hnena Loan pechhuak turin a ngen bawk.

Nimin-a Aizawl Press Club-a thuthar thehdarhtute a kawmna ah Mizoram Rajya Sabha MP, K. Vanlalvena chuan Coronavirus hripuiin khawvel min chawk buai mek a, ram hausa leh rethei thliar hrang lovin India ram leh keini, Mizoram State ngei pawh he hripui leh a kaihhnawih harsatna chitin rengin min tuam mek tih a sawi a. COVID-19 avanga khawvel ram hrang hrang insumdawntawnna leh inkalpawhna khar a nih vang te, ramchhung hmun hrang hranga inkalpawhna te khar a nih vang te, thilsiamna leh sumdawnna hmun tam tak khar a nih vang te, Industry leh Company hrang hranga hnathawktute hnathawk thei lova mahni In lama an haw darh avangte in India ram sum dehchhuah leh ei leh bar dinhmun nasa takin a tlahniam mek tih sawiin, COVID-19 Outbreak avanga India ram pum Economy dinhmun tlahniam mek hian harsatna lian zawk a thlentir lohna tur te, India ram hmalam hunah retheihna avanga buaina chi hrang hrang lo thleng theite pumpelh a nih theih nan kumin May 12 khan India Prime Minister, Narendra Modi chuan COVID-19 doletna Policy thar, ‘Atma Nirbhar Bharat Abhiyan’ puangin Sap tawng-in ‘Self-Reliant India Mission’ tih niin Mizo tawng chuan ‘India ram intodelhna tura beihpui thlakna’ tihna a ni tih a sawi.

Rajya Sabha MP chuan Atma Nirbhar Bharat Abhiyan kalphung tlangpuite pawh sawiin, mi ropuite leh hnam ropuite chuan khawvela harsatna leh buaina lo thleng hi dinchhuah nan an hmang thin a. Keini Zofate pawh hi Pathian leh a chanchin tha neitute kan nih avangin he COVID-19 leh a behbawm harsatna hian min hneh a thiang lova, kan hnam ropuina leh dinchhuahna hmanrua atan kan hmang zawk tur niin a lang a ni, a ti.

He ‘Self-Reliant India Mission’ Policy hi Mizoram-ah a tak ngeia tihhlawthlin anih theih nan Mizoram chhunga Bank awm zawng zawngte chu mipuite hnena Loan pechhuak turin a ngen a, Loan rul theitu tur ngaihtuah lovin, a mamawhtu te hnena pekchhuah chu he Policy-in a tum bulpui ber a ni tih hre tur leh inbuatsaih turin a ngen bawk.

Comments

Chhiar Hlawhte