Congress Party in hmalam hun duhawm tak a nei tih a chiang - Lal Thanhawla

MPCC President, Lal Thanhawla chuan Village Council inthlan neih zawh tak result atangin Congress Party-in hmalam hun duhawm tak a nei a ni tih a chiang hle tih a sawi.

Village Council inthlan chungchanga Press Statement a siam ah Mizoram Pradesh Congress Committee (MPCC) President, Lal Thanhawla chuan Congress sawrkar hlim, kum 2009-a inthlan tum khan Congress Party-in VC 444 an lak laiin MNF-in VC 30 chauh an la thei tih sawiin, “Kum 2020-a MNF phur vanglai taka inthlanna ah erawh MNF-in seat 1624 lain Village Council leh Local Council 374 chauh an siam thei a, Congress party-in seat 685 lain Village Council leh Local Council 100 zet kan siam thung. Hei hian Congress Party-ah Mizoram mipuiin rinna an la nghat thuk hle a ni tih a ti chiang a, a lawmawm takzet a ni,” a ti a. Congress party-in Pathian awmpuina an dawng zel tih sawiin, “Ram rorelna fawng min chelh tir leh thuai dawn a ni tih a chiang hle ah ka ngai a ni,” a ti bawk.

MPCC President chuan Village Council leh Local Council Election 2020-a Congress party ticket-a ding zawng zawngte a chhuang takzet tih pawh sawiin, anmahni avangin an Party tan hmalamah kawl a eng hle tih a sawi a. “Thlantlin zawng zawngte ka lawmpuiin, ram leh khawtlang tana in rawngbawlna turah duhsakna ka hlan che u a, tling zo ta lote pawh hnual mai lo a, hma lam pan zel turin duhsakna ka hlan a che u,” tiin Congress mipuite pawh hmun tinah an ngelngheh zia a lang chiang niin a sawi bawk.