Latest News

Kum 84 mi niin India President hlui Pranab Mukherjee a boral

India rama Politician hlun ber te zing ami leh India President hlui, Pranab Mukherjee chu nimin tlai khan New Delhi-a Army's Research and Referral Hospital-ah a boral a, kum 84 mi a ni.

Pranab Mukherjee hi kumin August 10 khan damdawi In ah dahluh niin hemi hnu hian COVID-19 hri a kai tih Twitter kaltlangin a puang a, hemi hnu hian a Thluak lamah harsatna a neih avangin zai a ni leh bawk a, hemi hnu hian damdawi In ah enkawl zui niin thatchhuah leh tak tak a nei tawh lova, niminpiah atang khan a dinhmun hi thalo zualin Ventilator hman a ni a. Doctor te chuan Thin leh Kal thalo a nei bawk tih sawiin, nimin tlai dar 5:46 khan a fapa, Lok Sabha MP Abhijit Mukherjee chuan twitter kaltlangin a boral thu hi a puang ta a ni.

Pranab Mukherjee hi December 11, 1935 khan West Bengal-a Mirati khua ah a lo piang a, Zirna lamah chuan MA (History), MA (Political Science), LL.B., D. Litt. (Honoris Causa) a ni a, Vidyasagar College, Suri, Calcutta University, West Bengal-ah te lehkha a zir thin. Politics-a a luh hma chuan Social Worker, Zirtirtu, Journalist, Writer hna te a thawk thin a, a hna hmasa ber chu Upper Division Clerk (UDC) niin Deputy Accountant-General (Post and Telegraph) Calcutta-ah a thawk thin a, hemi hnu hian Vidyanagar College-ah thawkin Journalist hna a thawk leh a. Kum 1969-ah Politics luhchilhin Indian National Congress (INC) a zawm a, hemi kum vek hian kum 35 mi niin Rajya Sabha Member atan thlan niin 1975, 1981, 1993 leh 1999-ah te thlan leh a ni bawk a. Kum 1973 atangin Union Cabinet Minister ni tanin khatih laia Prime Minister, Indira Gandhi kut ke ber te zing ami a ni a, kum 1980 atanga 1985 thleng khan Rajya Sabha-ah House Leader a ni bawk.

Kum 1984-a Indira Gandhi a boral hnuah engmaw harsatna an tawh zui tak avangin kum 1986-ah Rashtriya Samajwadi Congress (RSC) a din a, amaherawh chu kum thum hnuah Congress Party nen inzawm lehin a Politics hun hman chu Congress Party-ah hian a hmang zo ta a ni.

Pranab Mukherjee hian India sawrkar-ah nihna pawimawh tak tak chelh tawhin kum 2012-2017 chhung khan India President hna chelhin India President 12-na a ni a, hemi hmalam hian Union Finance Minister hna te, Defence Minister hna te, External Affairs Minister hna te, Lok Sabha Leader hna leh hna pawimawh hrang hrangte chelh tawhin kum 2008 khan India Civil mite chawimawina sang ber dawttu, Padma Vibhushan hlan a nih hnuah kum 2019 khan Civil mite chawimawina sang ber, Bharat Ratna hlan leh a ni bawk.

Comments

Popular News (Last 30 Days)