Chanchin thar thenkhat :

Sum tlingkhawm awmlo

Finance changtu Chief Minister, Zoram-thanga chuan COVID-19 hri leng avanga sawrkar hnathawk te hlawh bat sak chu sum awmloh avanga bat a nih avangin tlingkhawm tur a awmlo tih ZPM Member, C. Lalsawivunga zawhna ziaka a chhanna a sawi a, COVID-19 kaihhnawih atana hman tur sawrkar laipui atangin cheng vbc. 30.98 dawn a nih thu sawiin, COVID-19 dona atana Mizoram sawrkar hnathawk hlawh bat sak tling-khawm chu cheng vbc. 41.31 a nih thu pawh sawiin, heng hlawh bat sak rulh leh dan tur chungchangah GP Account nei tho, a sum faia rulh duh leh GPF neilo te chu June thla hlawh bat sak August thla ah rulh nise, July thla hlawh bat sak September-ah rulh nise tiin ruahman a nih thu a sawi bawk.


Inthlanna tur puan belh

Mizoram State Election Commission (SEC) in August 27, 2020-a Village Council leh Local Council inthlanna a buatsaih tuma inthlang ve theilo Local Council 24 leh Village Council 8 zinga Local Council 17 leh Village Council 5-ah te Vawiin-a inthlanna nei tura a tih hnuah nimin khan thuchhuah siam lehin Local Council dang 5-ah te pawh inthlanna nei tura a tih bakah Village Council pathum (3)-ah te pawh inthlanna hi nei turin a ti a. Hetianga inthlanna hi neih theih a nih chuan VC leh LC inthlanna nei tur zingah Local Council pahnih te tihloh ah chuan inthlanna hi neih kim theih a ni dawn ta a ni.


MJA ten COVID-19 zirho

Nimin khan Lawngtlai-ah Chief Medical Officer (CMO), Dr. LC. Liana hovin Mizoram Journalists' Association (MJA) member te tan COVID-19 hri leng mek chungchanga hriat tur pawimawh hrang hrang zirhona neih a ni a, he hunah hian COVID-19 hri leng chungchanga hriat tur pawimawh hrang hrang sawifiah niin COVID-19 chungchang leh a dona leh enkawlna kawnga Indian Council of Medical Research (ICMR) leh Mizoram sawrkarin inkaihhruaina a siam te zirho a ni bawk.


Thil diklo ti te hrem tum

Supply Minister, K. Lalrinliana chuan nimin a Assembly thutkhawm ah COVID-19 avanga mipuiin harsatna an tawk tur chhan nana a thlawna buhfai leh thildang an semah diklo a awm a nih chuan thil tidik lotute hrem an nih tur thu a sawi a, thil diklo ti te chu a hnena hrilh turin House member te a ngen bawk. Supply Minister chuan COVID-19 in Mizoram nuai ve mah se eirawng-bawlna Gas-ah Mizoram chu a la hnianghnar rih tih pawh sawiin, hemi kawnga Chief Minister hmalakna te pawh a sawilang bawk.


Vairengte-a RAT titawp

Assam leh Tripura atanga Mizoram-a rawn luhna Vairengte leh Kanhmun-a Rapid Antigen Test neih chu nimin, Sept. 3, 2020 atang khan thiamchin awm lova tihtawp niin ramri ah hian Thermal Screening/Normal Screening chiah kalpui a ni tawh ang. August 1, 2020 atanga Vairengte kaltlanga Mizoram-a rawn lut turte Rapid Antigen Test (RAT) hmanga enfiah ah hian mi 11,583 zet enfiah ni tawhin hri kai 106 hmuhchhuah an ni tawh a, an zinga a tam zawk chu enkawl dam an ni tawh bawk.


Cheng nuai khat ruahman

COVID-19 hrileng avanga Indo-Myanmar ramri ah tlawmngaia duty leh a duty laia Scrub Typhus vei-a thihpui ta, C. Laltanpuia s/o C. Sual-neka, Champhai Vengthlang chu Chief Minis-ter's Relief Fund for COVID-19 atangin a ral na tur cheng nuai khat (1) sanction a ni.

Comments

Chhiar Hlawhte