Chanchin thar thenkhat :

Nasha Mukh Bharat Campaign

Nimin khan Champhai-ah 'Nasha Mukh Bharat Campaign' kalpui dan tur sawihona neih a ni. 'Nasha Mukh Bharat Campaign' hi ruihhlo leh a kaihhnawih hrang hrang laka India ram a fihlim theihna tura sawrkar laipui-a Ministry of Social Justice & Empowerment leh Mizoram Social Defence & Rehabilitation Board-te tangkawp hmalakna niin kum 2020-2021 chhung hian India rama District 272-ah ruihhlo do hmalakna hi kalpui tum a ni a, Mizoram-ah chuan Aizawl, Kolasib leh Champhai District-te chu hmalakna tur hian thlan niin Narcotics Bureau leh Ministry of Social Justice & Empowerment kaltlanga National Survey neihin drugs hluarna ni-a a hriat District zulzuia thlante an ni. He Campaign hi Champhai District-ah chuan September 2020 atanga March 2021 chhunga kalpui tura ruahman chhin niin, Action Plan duan leh senso turte chu he hunah hian sawiho a ni.


Hnam ang-a inbeih duhlo

Assam Rifles Ex-Servicemen Association chuan tunhnaia Assam Rifles/MHA leh Mizo-ram Sawrkar inkara harsatna lo awm palh avanga buaina lo chhuak ta chu pawi an tih thu thuchhuah siama tarlangin, he harsatna chinfel tumin inbiakna te neiin theihtawp an chhuah mek tih an tarlang a. Hetihlaia Mizo Assam Rifles tang tawh leh tang mek ten an hnampui te atanga beihna nasa tak, diriamna leh hmuhsitna an tawk chu na an tih thu sawiin, a hnam ang zawng leh mimal taka inbeihna chu tawp tawh se an duh tih an sawi bawk.


Zu leh ruihhlo man hnem

Kumin March 22-a Mizoram-a Lockdown kalpui a nih atanga August thla tawp thleng khan Excise & Narcotics Department chuan Rakzu litre 16687.785 man tawhin Zu bilhlai Tin 47762.5 an man tawh bawk a, Dawidim Kg. 107.230 manin Zu siamna bel 283 an man a, Sapzu Um puitling 1679 bakah Beer can 1926 manin Heroin gram 1405.578; Ganja gram 798.691 leh Meth-amphetamine Kg. 29 an man tawh bawk.


Opp. party lian ber-ah inchhal

Mizoram Pradesh Congress Committee chuan Village Council leh Local Council inthlan atangin Congress Party chu Opposition Party lian ber an ni tih chiang takin a lang tih nimin khan thu-chhuah siamin an tarlang a. Kum 2009-a VC inthlan nena khaikhin pawhin MNF sawrkar chuan Congress party sawrkar tirh kha a tluk lo hle niin an tarlang bawk.


Mau chin tur sawifiah

Chief Minister, Zoramthanga chuan nimin a Assembly inkhawm ah SEDP hnuaia Raw chin tura Brandisii leh Latiflorus te thlan a nih chhan sawiin, National Bamboo Mission-in mau chin tur an thlan chu an hriat ang an tarlang mai niin a sawi a. Latiflorus phei chu ama huanah kum 20 vel phun a nih tawh avangin Mizorama tualto angah an ngai tawh tih a sawi bawk.


Ruihhlo vanga thi 45 awm

Excise & Narcotics Department ten an chhin-chhiah danin kumin January thla atanga August thla thleng khan Mizoram-ah ruihhlo vanga thi mi 45 an awm tawh a, heng te hi mipa 41 leh hmeichhia 4 an ni. Chhinchhiahna atanga a lan danin nikum khan Mizoram-ah hian ruihhlo vanga thi mi 55 awmin heng te hi mipa 42 leh hmeichhia 13 an ni.

Comments

Chhiar Hlawhte