Chanchin thar thenkhat :

Mizoram Rajya Sabha MP hmalakna ah lawmthu sawi

Bru Welfare Union India chuan Mizoram Rajya Sabha MP hmalakna ah lawmthu an sawi. Bru Welfare Union India thuchhuah tarlan danin Draurai S/o Thangphiaia, New Eden, Mamit District, Delhi-a mi In-a inhlawha awm chu an awmna ten kawng hrang hranga an tih duhdah bakah a hlawh thla thum lai mai an pe duh lo bawk tih an sawi a. A harsatna hi hriain Mizoram Rajya Sabha MP, K.Vanlalvena chuan Delhi Police kovin Police te kaihhruaina hnuaiah hian Draurai awmna In-ah hian kalin thla thum (3) hlawh an bat sak pawh an lo pe niin an sawi a. “Hetianga Mizoram khua leh tui tana pa nih tling tak MP, K.Vanlalvena kan nei hi keini Bru Welfare Union India, General Headquarter Tanhril Aizawl chuan lawmawm kan ti tak zet a, a chungah lawmthu kan sawi tak zet a ni,” an ti.

COVID Test ve thei dawn

Mizoram sawrkar chuan mimal damdawi In leh Laboratory-ten COVID-19 endikna an kalpui a phalsak. Hemi chungchang hi Mizoram sawrkar Council of Minister thukhawm in an pawm hnuah Zirtawpni tlai khan Mizoram sawrkar chuan Gazette-ah tichhuakin a tarlang a, hemi ang hian mimal damdawi In leh Laboratory-ten COVID-19 endikna an kalpui thei tawh dawn a, sawrkar in sample endik leh lakhawm thei tura dan a zam leh inkaihhruainate an zawm ngei a ngai dawn a ni. Sample lak leh endik man chung-chang ah State sawrkarin a bituk angin heng mimal damdawi In leh Laboratory hian an kalpui tur a ni a, sample lakna hmun, Sample Collection Centre pawh sawrkarin a ruahmansak anga, inkaih-hruaina pawh state sawrkar ruahmang anga kalpui tur a nih thu tarlan a ni.

VC sum hmuh tur ti danglam

Kolasib District -a VC 52 te mipui tam dan ennawn anih hnuah Rural Local Body Fund kal-tlanga an sum hmuh tur a tlahniam. 15th Finance Commission kaltlanga Mizoram chhunga Village Council ten Rural Local Body Fund, kum 2020-2021 atana VC te hnathawhna tur sum chu VC then-khata mipui awm zat dik loh avangin siamthat a ni a, siamthat zingah hian Kolasib District-a VC 8 pawh telin, VC thenkhat sum hmuh tur hi a hma aiin a hniam phah a, hei hi VC thar a pian vang leh a hmaa mipui awm zat chu a tlem tak vang a ni. Zirtawpni thleng khan Rural Local Body Fund hian Kolasib DLAO Office-ah ala thleng lova, ruahman lawk dan chuan sum pek chhuah tur Rs. 997,89,000/- atangin First Instalment Rs. 249,47,000/- pekchhuah phawt tur a ni ang.

Hri kai zaa 63.49 dam tawh

Nimin thleng khan Mizoram-ah COVID-19 hri kai hmuhchhuah zawng zawng chu 1578 an tling ta a, heng te hi mipa 1297 leh hmeichhia 281 niin mi 1002 te chu enkawl dam an ni tawh a, hri kai enkawllai 576 awmin hri kai zinga zaa 63.49 chu enkawl dam an ni tawh a ni.

Ngaihdam dil turin phut

Mizoram Pradesh Congress Committee (MP-CC) Communication Department chuan COVID-19 hripui kai pung zel mipui inthlahdah vang ang hiala Health Minister-in a sawi chu lungchhiatthlak an tih thu sawiin, COVID-19 hripui India rama a darh tan tirh atang tawh khan MNF sawrkar chu finchhuah tumin theihtawp chhuahin hma an lo lak tawhthu an sawi a. Hri leng chungchangah hmalakna fello tam tak a awm thu sawiin, Health Minister thusawi chu mipui zahlohna ah an ngaih thu leh ngaihdam dil tura an phut thu an sawi bawk.

Mi bo ruang hmuh a ni

Thawhtanni kalta atanga chin hriatloh a bo, MC. Lalropianga, Siachangkawn chu Inrinni zing khan Tuipui Ferry-ah thi-a hmuh a ni. Kum 27-a upa MC. Lalropianga hi Thawhtanni khan Chhimtuipui, Fungkah ram-a a inhlawhna huan atanga a leng chu chin hriatloh in a bo a, khawtlang huapa zawn a nih hnuah Inrinni zing khan Tuipui Ferry ah Balu la tura Lawngleng-a kal ten a ruang hi an hmu a ni. MC. Lalropianga ruang hi Inrinni khan an chenna In ah lak niin hemi ni vek hian vuiliam nghal a ni.