Hri kai 2 hmuh belh an ni

Serchhip District-a TrueNat Laboratory-ah niminpiah khan sample 29 enfiah leh niin hri kai mi 2 hmuhchhuah an ni a, State pawn atanga rawn lut ve ve an ni.

Serchhip CMO Office atanga thu kan dawn danin niminpiah khan Serchhip TrueNat Laboratory-ah hian Sample 29 enfiah niin heng atanga hri kai hmuhchhuah pahnih te hi Tantia Construction hnuaia thawk, Assam atanga rawn lut leh Thenzawl-a anmahni hmuna inkhung-hrang mek te an ni a, heng mite hi kum 26 leh 27 mi te niin tun thla ni 11 khan Serchhip District an rawn thleng a, an sample enfiaha hri an kai tih hmuhchhuah a nih hnu hian Chhiahtlang Tourist Lodge CCC-ah dahluh nghal an ni. Heti hian nimin thleng khan Serchhip District-ah COVID-19 hri kai hmuhchhuah chu mi 28 an tling tawh a, an zinga mi 14 te chu enkawl dam niin midang 14 te chu enkawl mek an ni thung.

Niminpiah khan Serchhip District-ah hian Rapid Antigen Test hmangin Sample pahnih enfiah niin hri lakah an fihlim thung a ni. Nimin khan Serchhip-a TrueNat Laboratory-ah Sample 13 enfiah niin Rapid Antigen Test (RAgT) hmangin Sample 6 enfiah a ni bawk a, nizan khan result pawh hriat leh nghal theih beisei a ni.