AMC huamchhunga Lockdown kalpui mek Pathianni zan thleng pawhsei a ni

Hripui leng mek avanga Aizawl khawpui chhunga Contact Tracing leh Sample lakkhawm hna chak zawka thawh a nih theihna tura Lockdown kalpui mek nizan zanlai-a tawp tur chu Contact Tracing leh Sample lakkhawm hna zawhfel ala nih loh avangin tun thla ni 20 zan dar 11:59 thleng khan Lockdown hi kalpui chhunzawm a ni dawn.

Nimin chawhnu khan Health Minister, Dr. R. Lalthangliana hovin Home Minister, I&PR Minister leh Chief Secretary bakah sawrkar mi pawimawh te chuan AMC huamchhunga Partial Lockdown kalpui mek chungchang thlirin thutkhawm an nei a, he hunah hian Contact Tracing, Sample Collection leh Sample Test report te ngaithlain ngawrh lehzuala hmalak chhunzawm a nih a, heng thil tih tur tul zawng zawngte felfai taka zawhfel a nih theih nan AMC huamchhunga Partial lockdown hman mek chu September ni 20, 2020 zanlai dar 11:59 thleng pawhsei an rel a ni.

Zirtawpni kalta zan atanga AMC huamchhunga Partial Lockdown kalpui a nih atang khan hri leng chungchangah ngawrh taka hmalak niin ICMR Portal-a chhinchhiah a nih danin AMC Area-ah Sample 13,812 lakkhawm a ni a, ZMC Laboratory-ah nizan hmasa thleng khan Sample 5751 enfiah niin Rapid Antigen Test 84 tih a ni a. COVID-19 positive 125 hmuhchhuah an ni a, he hmalakna hi chhunzawm zel a ni dawn a ni.

He thutkhawm ah hian Health Minister, Dr. R. Lalthangliana chuan COVID-19 hri leng lo hmachhawn tur hian sawrkar chuan theih-tawpa hma a lak thu sawiin, a tirah Sample Test theihna kan neihloh avangin State pawnah 58 thawn a nih thu leh tunah chuan State chhungah RT-PCR khawl pathum (3) nen Sample Test hi kalpui a nih thu a sawi a. Sawrkar laipui in Co-VID-19 test-na atan TrueNat hman a phal hnu, July 12, 2020 atangin Lunglei-ah hman a nih ve thu leh District tinah TrueNAT Laboratory din a nih theih nan hmalak a nih thu a sawi bawk.

He hunah hian Mizoram-a COVID-19 hri kai hmuhchhuah a nih theihna tura Laboratory dinna tura sum hmanna te tarlan niin sawrkar sum ruahman atangin Truenat Test Kit lei belh tum mek a nih thu leh Rapid Antigen Test kits leina tur dil leh mek a nih thu te pawh tarlan a ni bawk.

Comments

Chhiar Hlawhte