ZPM in Bialtu MLA tan theihtawp chhuah zel tum

Serchhip leh Thenzawl-a ZPM Block Committee chuan Serchhip Bialtu MLA, Lalduhoma chu MLA atangin paihthlak pawh lo nise a tlin leh ngei theihna turin a bial mipui ten theihtawp an chhuah dawn tih an sawi.

Nimin-a thuchhuah intawm an siamah Serchhip leh Thenzawl ZPM Block Committee chuan tunhnai maia Zoramthanga kaihhruai MNF sawrkarin Anti-Defection Law (10th Schedule of the Indian Constitution) rinchhana ZPM MLA, Lalduhoma an beihna – MLA a nihna atanga bang tura tihna thu an chhuah ta mai chu lungawi thlak loh an tih thu leh an dem thu an sawi a. He thil chungchanga MNF sawrkar thil tih dan hian, an rinchhan ber Anti-defection Law-in a tum ber (Main Intent) pawh a thelh hle nia sawiin, “ZPM MLA-te lo kal chhoh tawh dan hi Party hrang hrang MLA-te lo kal chhoh tawh dan tho, tumahin sawisel leh khin en-a an en thin ngai loh thil a nih avangte in a chauhthubarawh thil tih kan ti hle bawk a ni,” an ti.

He an thuchhuah ah hian Lalduhoma hian MLA ni tlaklo tur khawpin engmah tih dikloh leh tihsual a nei lo nia sawiin, hetianga titute hian a thlang tlingtu Serchhip Bial mipuite pawh a zah lovin a hmusit hle nia an hriat thu an tarlang a. “He inpuhmawhna leh inbeihna chungchanga an thu laimu ber, ‘Thlangtlingtu phatsanna’-ah hian, kan MLA Pu Lalduhoma hian a thlangtlingtu, a Bial mipui leh ZPM Party hi pakhat mahin a phatsan lo,” an ti bawk.