Assembly in Dan thar siamna tur Bill an pawm

Ordinance hmanga hri leng dona dan hman mek 'The Mizoram (Containment and Prevention of the spread of Covid 19) Bill, 2020' chu dan puitling atan pawm a ni.

He Bill hi nimin Assembly thutkhawm ah Health Minister, Dr. R. Lalthangliana chuan a pulut a, Bill putluh a nih chhan a sawifiahna ah Health Minister chuan, COVID-19 hri leng vangin khawvel pumah chhiatna a thleng a, Mizoram-ah pawh hun engemaw chen hri kai an awm loh hnuah tunah chuan hri kai sang chuang an awm tawh a, hri a darh zel loh nana mipui zawm tur dan khauh tak neih chu sawrkar laipui pawhin a ngai pawimawh hle a ni, a ti. Dr. R. Lalthangliana chuan, sawrkar laipui duh dan zul zuiin hri leng dona dan hi Mizoram-ah pawh May ni 3 atang khan Ordinance hmanga hman a ni a, hemi atan hian Larsap pawmpuina la-in, Dan ang thlapa thil engkim kalpui a ni a, chutah chuan mipui zawm tur te, tih tur leh tir loh turte chipchiar taka tarlan niin, dan bawhchhiate hremna pawh dah a ni a. He dan hi hri leng darh zel tur venna atan loh theih lohva hman ngai a nih vangin member-te chu pawmpui turin a ngen a ni. 

Nimin a thutkhawm ah hian he Bill sawihona hi neih zui nghal niin Bill sawitu zingah House Leader, Zoramthanga chuan hri leng dona kawngah Sawrkar-in tih fuh tawkloh tam tak a nei tih an in pawm thu leh theihtawp an chhuah zel dawn tih a sawi a. Chief Minister Relief Fund pawh tangkai zawka hman a nih theih nan infinchhuah zel ni se a duh tih he hunah hian a sawi bawk.

Opposition Group Leader, Lalduhoma pawhin hri leng do kawnga thil pawimawh ber pakhat tanrual chu Sawrkar-in a hlamchhiah ni-a a hriat thu sawiin, State pum huap chu sawi loh, tualchhunga hri leng dona ah eptu MLA-te chu anmahni bial-ah ngei pawh tel vena pakhat pawh an nei lova, Sawrkar-in a dah pawn lang hle a ni, a ti a. Hetiang a ni chung hian hri leng dona atan an hlawh pe in, Fund pawh Vawiin thlengin an thawh a, eptu lam chuan an tih tur an ti nia a hriat thu leh, sawrkar chhanlet dan erawh a phur awm lo hle tih sawiin, hri leng do hnehna tur thil pawimawh ber pakhat tanrual chungchang chu Sawrkar-in a hlamchhiah ni-a lang chu a tha lo hle tih a sawi bawk.

He hunah hian Congress Group Leader, Zodintluanga pawhin Mizoram Sawrkar chu tuna a kal dan phung thlak a, hri leng dona atan sum tam zawk hmang tura a duh thu a sawi a. CM Relief Fund pawh hri leng dona atan hman loh thei lovin a ni a. Hetiang a nih mek lai hian Department thenkhatah chuan Budget kungpui atangin sum an hmang thei reng a, hri dotu Health Department berin Plan fund a hman theih lo bik chu thil tha lo tak a nih avangin siam that thuai nise a duh tih a sawi bawk.

Comments

Chhiar Hlawhte