COVID-19 hri kai enkawl te hri laka an fihlim hma loh chuan chhuahtir an ni dawn lo

Health Minister, Dr. R. Lalthangliana hova nimin-a sawrkar mi pawimawh te inrawnkhawm chuan sawrkar in COVID-19 veite an sample test a negative hma chuan anmahni enkawlna hmun CCC/DCHC/DCH atangin chhuahtir loh tur tih a kalpui lai mek hi hman chhunzawm zel tha an ti.

Nimin-a SAD Conference Hall, Aizawl-a Health Minister hova inrawnkhawmna ah hian Medical Operational Team on COVID-19 Chairman, Dr. ZR Thiamsanga MLA leh Chief Secretary Lalnunmawia Chuaungo bakah tlawmngai pawl, Doctor leh Kohhran aiawhte telin Health Minister chuan sawrkar laipui chhut danin Mizoram-ah kumin December thla hian COVID-19 positive 5000 chuang hmuhchhuah a ni tawh dawn a, tuna COVID-19 hri kai enkawl dam tawhte percentage anga chhutin mi 2000 bawr vel hri kai mek nei turah kan inngai tih a sawi a. Mizoram chhunga COVID-19 positive te enkawlna tur damdawi In kan neihsa te hian min dawl zo dawnlo nia hriat a nih thu leh kan hmalam hun hriat a ni lo tih sawiin, Contingency Plan siam-a lo in ruahman lawk tawh a nih thu leh Chief Minister pawhin ruahmanna te a pawmsak tawh tih a sawi a. CCC indaihlohna phuhru turin theihtawpa hmalak a nih thu leh YMA leh Kohhranho tanpuina an la mamawh dawn chauh tih a sawi bawk.

He thutkhawm a tel te hian COVID-19 veite an sample test a negative hma chuan anmahni enkawlna hmun CCC/DCHC/DCH atangin chhuahtir loh tur tih chu hman chhunzawm zel tha tiin Mizoram-ah COVID-19 positive an pun zela, CCC/DCHC/DCH-ah te indah sen loh hun a thleng a nih chuan mipui mar dek chung leh mipuite ngaihdan ngaichang chung zelin thutlukna siam nise an ti a. CCC kan neih sa bakah tunhnai ah CCC atana hman tur 4 hmuh thar a nih thu he hunah hian tarlan niin, chungte chu - JNV School, Thingsulthliah (khum 318 awm theihna), Montford School, Melriat (khum 86 awm theihna), Gilead Special School, Bawngkawn, Aizawl (khum 53 awm theihna), SIRD Hostel, Thing-sulthliah (khum 25 awm theihna) te a ni a. Veng leh khaw thenkhatah CCC awm an remtih loh avanga harsatna awm thin pawh sawichhuah niin heng CCC te hi pawn lam mi tan a hlauhawmloh thu inhrilhfiah chian a tul tih tarlan a ni bawk.