ZPM in Voters te himna ruahman turin SEC an ngen

Zoram People’s Movement (ZPM) chuan Local Council leh Village Council inthlanna lo awm turah Voters te himna ngei tur ruahmanna siam turin State Election Commission chu an ngen.

Inrinni-a thuchhuah an siamah ZPM chuan kan hma lawka Local Council leh Village Council inthlanna kan neih tur chu COVID-19 hripuiin min luhchilh lai, ei bar zawn tul leh mamawh zual lam tur pawha pâwn kan chhuah that ngam mangloh lai leh campaign pawh rilru inhawng taka kan welcome that chiah loh lai a ni tih sawiin, kum upa leh hriselna lama harsatna tawk mek te tan phei chuan a huphurhawm hle dawn nia a lan thu an sawi a. Hei vang hian vote tla pawh a tlem phah ngeiin a rinawm tih sawiin, heti chunga kan inthlang dawn anih chuan State Election Commission (SEC) chuan Election Commission of India (ECI) in voters te himna tura a duan (ECI/PN/50/2020 Dated 21st August 2020) angin vote thlaktute himna tur ngaihtuah sak se an duh thu an sawi a ni.

ZPM thuchhuah chuan Vote thlakna ah hian kutkawr (glove) him leh hmai khuhna (Face mask) a thlawna hman theih turte leh kut silfaina tur sahbawn leh tui thianghlim te pawh Polling Area-ah chhawpin a hmunhma te kap thianghlim ngei se, Ballot Paper leh a chhutna Seal pawh voters te tana him ngei tura buatsaih turin an ngen tih an sawi a. Vote thlak avanga hri kai palh an lo awm anih chuan a chhawmdawl dan turte pawh puang chiang ngei se an duh thu an sawi bawk.