COVID-19 hri lengah Health Ministry chhut ang Mizoram-ah a thlen loh nan hmalak a ni

Health Minister Dr. R. Lalthangliana chuan Health Ministry in Mizoram-ah December thla tirah COVID-19 hripui vei 5000 chuang awm thei anga a chhut chu thleng lo turin theihtawpin hmalak a ni, a ti a. Village Council leh Local Council inthlanna neih turah inkaihhruaina Dan siam te tha taka zawm turin mipuite a chah bawk.

Inrinni-a TV kaltlanga mipuite hnena thuchah a sawina ah Health Minister, Dr. R. Lalthangliana chuan Sawrkar laipui-a Health Ministry in Mizoram dinhmun tur min chhut sak dan anga December thla tirah chuan Mizoram-ah COVID-19 hripui vei 5000 chuang awm tawh turah ngaih chu Pathian khawngaihna azarah hetiang em thleng lo tur hian theihtawpin hmalak a nih thu leh a hlawhtlin ngei an inbeisei thu a sawi a. Inkharkhip chu kalpui reng theih a ni dawn lo tih sawiin, ei leh bar bakah nitina eizawnna kawng zawh leh a ngai dawn a, hetah hian mipuite pawhin mawhphurhna an nei lian em em a ni tih hre thar turin a chah a. Himna atana tihtur pawimawhte chu ngai pawimawh reng turin mipui a chah a ni.

Health Minister chuan COVID-19 hri kai enkawlna kawngah thawktu indaihlohna a nasa em em tih pawh sawiin, sawrkar laipui chhut anga Mizoram-ah hri kai kan pung anih chuan thawktu mi 1200 bawr vel mamawh an ni dawn tih a sawi a, tlawmngaia inpe engemawzat an awm tawh laiin midang inpe thei pawh an lawm reng tih a sawi bawk.

PCR khawl tenau, TrueNAT Quattro pawh District 10 a dah turin a rawn thleng fel tawh tih sawiin Health Minister chuan, Safety Lab pawh sak zawh tawh niin a khawl buntu tur Engineer pawh Zirtawpni khan lo thlengin a hna a thawk nghal tih a sawi a, an hnathawhna te chu Inspection Team in umzui nghal zelin tun thla chhung ngei hian heng khawl te hi a taka hman theih tura peihfel vek tum a ni, a ti a. Khawl enkawltu tur leh vil tur Doctor leh Technician te pawh training pek vek tawh an nih thu a sawi bawk.

Kan hma lawk, August ni 27-a Local Council leh Village Council inthlan lo awm turah State Election Commission-in inkaihhruaina a siam te chu tha taka zawm turin inthlan buat-saihtute leh mipuite ngenin Health Minister chuan, hri laka himna tura sawrkar dan siamte zawm theuh turin mipuite chu a ngen a. Phungthluk hun a ni lo tih sawiin, in chibai emaw, inhnaih tak taka inbiak emaw, awmkhawm/punkhawm hut hut te ti lo hram tur leh sawrkar hotuten inthlanni a inkaihhruaina dan an siamte tha taka zawm turin a ngen a, hei hi mitin him tlanna tura an ruahman a ni tih hre thar theuh turin a ngen bawk a ni.