Mizoram-ah COVID-19 hri kai 918 an tling ta

Mizoram-a COVID-19 hri kai hmuhchhuah chu 918 an tling ta a, ni 2 chhungin hri kai 22 hmuhchhuah leh an ni bawk.

Sawrkar thuchhuah in a tarlan danin Zirtawpni khan ZMC Laboratory-ah Sample 473 enfiah leh niin heng atang hian hri kai 6 hmuh belh a ni a, heng zinga 5 te hi Aizawl District mi niin midang pakhat hi Serchhip District mi a ni thung. Aizawl District-a hri kai hmuhchhuah pakhat hi hri kai hmuhchhuah tawh nen lo inkawm hnaih atanga kai niin amah hi Tuikual North mi a ni a, midang te hi Salem Veng mi pakhat, Tuikual South mi pakhat leh Tuirial-a BSF mi 2 te niin Quarantine Centre-a awmlai an ni hlawm. Serchhip District-a hri kai pakhat hmuhchhuah hi hnamdang, State pawn atanga rawn kir a ni bawk. Inrinni vek khan Kolasib District-ah hri kai pahnih hmuhchhuah a ni a, hri kai pakhat hi hnamdang driver niin pakhat dang hi Vairengte COVID-19 test-na hmuna duty a ni thung.

Hemi hnu Inrinni-a Sample enfiah atangin hri kai 14 hmuh belh leh an ni a, ZMC Laboratory-a Sample enfiah atangin hri kai 7 hmuh niin Aizawl-a Zangena Petrol Pump a hri kai hnimhnai chhuina kal zelah Lunglei (Electric Veng), Bukpui leh Khanpui khaw mi pakhat theuh te chuan hri an kai an ni tih hmuhchhuah a ni a. Anni bakah hian Sethawn khaw hmeichhia 2, hri kai mekin a kaichhawn Thingdawl inkhunghranna hmuna awm mek te, Melriat khaw mi Village Level Task Force-a mi 2, In lama khunghran mek te pawhin hri an kai tih hmuhchhuah a ni bawk.

Inrinni vek khan Rapid Antigen Test hmangin Kolasib District-ah hri kai mi 6 hmuh an ni bawk a, heng mite hi hnamdang, State pawn atanga rawn lut te vek niin lirthei khalhtute an ni a. Lunglei-a TrueNat Laboratory-ah hri kai pakhat hmuhchhuah niin Sakawrdai Quarantine Centre-a awm pakhat chu nimin khan hri a kai tih hmuhchhuah a ni bawk.

Heti hian nimin thleng khan Mizoram-ah COVID-19 hri kai an hmuhchhuah chu 918 an tling ta a, nimin khan mi 36 enkawl dam niin hri kai enkawl dam hi 459 an tling ta a, enkawllai mi 459 an awm mek bawk.

India ramah COVID-19 hri kai nuai 30 tling ta :

India rama COVID-19 hri kai hmuhchhuah chuan nuai 30 an tling ta a, Sample enfiah zawng zawng atanga zaa 8.63 te chuan hri hi an kai a ni. Ministry of Health & Family Welfare chhinchhiah danin India ramah hian mi 3,52,92,220 te Sample enfiah ni tawhin heng atang hian hri kai hmuhchhuah 30,44,940 an tling tawh a, hei hi Sample Test atanga chutin zaa 8.63 an tling a ni. India rama hri kai hmuhchhuah zingah hian 22,80,566 te chu enkawl dam niin hei hi hri kai hmuhchhuah atanga chhutin zaa 74.89 niin hri kai enkawllai 7,07,668 an awm mek a, nunna chan pawh 56,706 zet an awm tawh bawk a ni.