ZPM in ruahmanna siam loh pawi an tih thu sawi

Zoram People Movement (ZPM) chuan Village Level Task Force (VLTF) duty laia nunna chan te cheng nuai khat a ral bak an chhungte tana hnemhnanna tur engmah ruahmanna siam sak an ni lo chu pawi an tih thu an sawi.

Nimin-a thuchhuah an siamah ZPM General Hqrs. chuan COVID-19 hripuiin min luhchilh ta tih tarlangin, chanchin thar pawh hriat hrehawm khawpin nitin kai thar an awm zel bakah hripui hnaihchilh (frontline) a thawktute pawhin an kai ta tih an tarlang a. Chutih laiin Mizoram sawrkar in a Frontline-a a dah te zinga tam ber, National Health Mission (NHM) hnuaia contract-a thawktute tan security dah a ni miah lo chu mak an tih thu tarlangin, ZPM chuan NHM hnuaia thawkte mai ni lovin Local/Village Level Task Force-a thawktute nen lam security tha tak siam sak turin Mizoram sawrkar a lo phut tawh thu an sawi a, Mizoram sawrkarin a tih loh avangin VLTF duty laia nunna chan te pawh cheng nuai khat-a ral bak, an chhungte tana hnemhnan pui tur engmah ruahmanna siam sak an ni lo chu pawi an tih thu an tarlang a ni.