Chanchin thar thenkhat :

 Zirlai titha lawmpuina hlan

Kumin-a Higher Secondary School Leaving Certificate (HSSLC)Exam-a Commerce Stream-a Lawngtlai District atanga Top 10-a lang mi pahnih- Lalrintluangi d/o MC. Lalro-khuma, Lawngtlai-III (2nd Rank) Lalremruatmawia, s/o L. Lalthangzauva, Sangau-I (5th Rank) te chu nimin khan Lawngtlai East bialtu MLA, H. Biakzauva chuan Lawngtlai DC’s Conference Hall-ah chawimawina leh lawmpuina a hlan a, heng zirlai pahnih te hi an zir zelna tura an mamawh tur Laptop Computer a hlan a ni. Nimin a zirlai titha chawimawna hunah hian bialtu MLA chuan zirna chu mihring chher puitling tura hmanraw tangkai ber a nih thu sawiin, sawrkar pawhin sikul-a zirna chu ngai pawimawhin sum tam tak a dah tih a sawi bawk.

Hnahthial-ah DLFT thukhawm

Nimin khan Hnahthial-ah District Level Task Force on COVID-19 chu District Bawrh-sap, Vanlalmawia kaihhruaia thukhawmin an District chhungah COVID-19 hri kai mi pahnih enkawl mek an nih thu leh an dinhmun hlauhthawn-awm a nih loh thu tarlan a ni a. He hunah hian Hnahthial SP, Lalbiakkila chuan Hnahthial District chhunga Myanmar nena inkalpawhna hrang hrang, March 2020 atanga khar chu August ni 8 khan tihtawp a nih thu leh Bungkhawkai-ah erawh Police an la duty chhunzawm zel tih a sawi bawk.

Khawzawl-ah Training nei

Nimin khan Khawzawl-ah tun thla ni 27 a Village Council inthlanpui neih tura an District chhung Village Council 38-a Returning Officer leh Presiding Officer tura ruatte tan training neih a ni a. Tun tum hi Khawzawl District a pian hnua VC inthlanna hmasa ber tur a nih avangin thil chhinchhiah tlak a nih thu leh inthlanna felfai tak, a hnua chhui zui tur hnu pawr awm lo ni thei se an duh thu thawktute chuan sawiin, hemi atan hian inthlan buaipuitute chu an pawimawh thu te tarlan a ni bawk.

Hremna sang ber pek phut

MHIP General Hqrs. chuan tun thla ni 15-a hmeichhe naupang rilru thianghlim, kumtlinglo laka C. Lalhmangaiha S/o Vanlalliana (L), Farm Veng Lunglei tenawm taka a che chu an dem thu leh an rilru a nat thu an sawi a. Hetiang thil rapthlak hi a thlen tawhloh nan Dan anga hremna sang ber pek an phut thu an sawi bawk.

SEC-ah ngenna thlen leh

BJP Mizoram Pradesh President, Vanlalhmuaka chuan nimin khan Mizoram State Election Commission-ah tun thla ni 27-a Village Council leh Local Council inthlanna neih tur chu hripui leng avanga thulh rih tura ngenna ziakin a thlen a, hemi hmalam hian Governor hnenah pawh hemi chung-chang hi alo thlen tawh bawk a ni.