Mizoram-ah hri kai mi 26 hmuh belh leh an ni

Niminpiah khan Mizoram-ah COVID-19 hri kai mi 26 hmuh belh leh niin Mizoram-a hri kai hmuhchhuah chu mi za riat an chuang ta.

Mizoram sawrkar thuchhuah tarlan danin niminpiah khan ZMC Laboratory-a Swab Sample enfiah 235 zingah COVID-19 vei 17 hmuhchhuah thar niin Rapid Antigen Test hmangin hri kai mi 5 hmuhchhuah a ni bawk a. Lunglei Civil Hospital TrueNAT Laboratory-a Sample enfiah zingah hri kai mi 4 hmuhchhuah an ni bawk.

ZMC Laboratory-a hri kai hmuhchhuah mi 17 te hi mipa vek niin Aizawl District-a Sample lak 16 leh Hnahthial District-a Sample lak mi pakhat an ni a, Aizawl District-a hri kai hmuhchhuah mi 16 zinga 9 te hi hri kai te nen lo inkawmhnaih atanga kai niin an zingah hian mipa naupang kum 6 mi pawh a tel a ni. Hri kai zinga 6 te chu Force mi niin Quarantine Facility atanga inkaichhawng ni a hriat an ni thung. Hnahthial atanga hri kai hmuhchhuah hi mipa kum 28-a upa niin Mizoram-a cheng sa nilo, Assam atanga rawn lut a ni thung.

Niminpiah-a Rapid Antigen Test hmanga hri kai 5 te hi Kolasib District mi vek niin hnamdang, lirthei khalhtu leh enkawltute vek an ni a, hri kai lanchhuahna neilo vek an ni bawk. Lunglei TrueNat khawl atanga hri kai hmuhchhuah 4 te pawh hi BSF Sipai vek an ni a, State pawn atanga rawn haw leh Quarantine Centre-a awmlai vek an ni.

Heti hian Mizoram-ah COVID-19 hri kai hmuhchhuah chu mi 815 an tling ta a, heng zinga mi 379 te chu enkawl dam ni tawhin tunah hian hri kai enkawllai 436 an awm mek a ni.

India-a COVID-19 hri kai nuai 27 tling tawh :

India ramah COVID-19 hri kai hmuhchhuah pung zelin nimin thleng khan hri kai hi mi nuai 27 an tling tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 8,99,864 enfiah leh niin hri kai hmuhchhuah thar 55,079 an awm leh a, heng te nen hian India rama Sample enfiah chu 3,09,41,264 niin hri kai hmuhchhuah pawh 27,02,742 an tling tawh a, Sample enfiah atanga chhutin zaa 8.73 te chuan hri an kai a ni. India rama hri kai enkawl dam zawng zawng chu 19,77,779 an tling tawh a, hri kai hmuhchhuah atanga enkawl dam hi zaa 73.17 an tling tawh bawk a, tunah hian hri kai enkawllai 6,73,166 an la awm mek a ni. Hetihlai hian darkar 24 kalta chhung khan mi 876 ten nunna chan lehin nunna chan zawng zawng chu 51,797 an tling tawh bawk a ni.

Comments

Chhiar Hlawhte