Latest News

Village Council inthlanpui neih turah Vote inthlak chhawk turin ruahman dawn

Serchhip District-a Village Council inthlanpui lo awm turah Polling Station leh a chhehvelah tumkhatah mi 50 aia tam punkhawm phal a ni dawn lova, Vote inthlak chhawk dan tur ruahman tur a ni ang.

Serchhip District Election Officer, Kumar Abhishek IAS chuan Mizoram State Election Commission (SEC) in hriattirna a lo tihchhuah tawh behchhana August ni 27, 2020 (Ningani)-a Serchhip District huamchhunga Village Council inthlan buatsaih turah him leh felfai taka kalpui anih theih nan, Vote thlak ni (Poll Day) a vote thlak tur leh duty ten an zawm tur thupek a tihchhuah ah hei hi a tarlang a. He thupek-ah hian Polling Station leh a chhehvelah tumkhatah mi 50 aia tam an pungkhawm tur a ni lo tih tarlangin, he thupek lo kengkawha ruahmanna lo siam turin khaw tina VLTF, NGO leh MPF te beisei an ni tih a tarlang a. Vote inthlak chhawk dan tur ruahmanna a remchan dan angin, House Number indawt dan emaw, Veng thler angin emaw, Branch YMA/Section milin Darkar bithliah siama vote inthlak chhawk dan tur lo ruahman tur a ni ang. Hei bakah hian Physical distancing (6 feet) dan zawm reng tur a ni a, MPF/NGO/Security/Medical duty te pawhin he dan hi an zawm ngei tur a ni a. Polling Station leh a chhehvel ah Chil chhak phal a ni lova, khuh dawn pawhin rawmawl hmanga hmui hup tur niin Face Mask vuah ngei ngei tur niin Face Mask vuahlo tan Vote thlak phal a ni lovang.

Polling Booth buatsaih dan tur pawh ruahmanna siam niin Vote thlak tur te ft. 6-a inhlata din tur a ni a, chhinchhiahna siamah chauh an intlar tur niin luhna leh chhuahna hran siam te dik taka zawm tur a ni dawn a, Vote thlak turte inziahluhna tura dah Register-ah Hming leh Phone Number ziahluh tir vek tur niin Register-a hming ziahluh hi Village Level Task Force te kutken tura beisei a ni bawk a. Polling Officials, Candidate leh an Agent te bakah phalna nei a Polling Booth-a lut ten Face Mask an vuah vek tur a ni a. Polling Booth a lut zawng zawng ten Hand Sanitizer chhawp an hmang ziah tur a ni bawk a. Kum upa leh tar chak lo, nu nau pawm leh rualbanlo (PwD) te, damlo bawrhsawm deuhte chu intlar tir lovin vote thlak tir nghal tur a ni bawk.

Village Council inthlanna a Vote tla te chu August 27, 2020 tlai dar 5:00 hnulam atangin neih tur a ni dawn a, Vote chhiarna hmunah hian Candidate leh Election Agent/Counting Agent-te bak chu Counting officials te chauh awm phal a ni a. Zan dar 8:30 atanga zing lam dar 4:30 inkar pawn chhuah khap/Curfew a nih avangin hemi hun chhung hian a chunga tarlan phalna nei bak chu tumah awm phal a ni lova. Counting Hall chhehvelah pawh Cote chhiar ngaithla turin tumah pungkhawm phal a ni lova. Inthlan Result hi tlangau/Public Address System hmanga puan tur a ni bawk ang. Inthlanna buatsaihtu leh Police duty te bakin Polling Booth leh Counting Hall chhungah Mobile Phone kenluh phal a ni lova, anni pawhin Silent Mode-ah an dah tur a ni bawk ang.

Comments

Popular News (Last 30 Days)