A thlawna sem tur Ration Chana pekchhuah a ni

Hripui leng avanga sawrkar laipui in National Food Security Act (NFSA) hnuaia AAY leh PHH Family te tana a thlawna Ration Chana sem tura ruahman chu nimin atang khan Serchhip PDC hnuaia Retailer hrang hrangte hnenah semchhuah tan a ni.

Sawrkar laipui in hripui leng avanga Pradhan Mantri Garib Kalyan Anna Yojana (PM-GKAY) kaltlanga chhungkaw harsa, NFSA hnuaia AAY leh PHH chhungkua te tana a thlawna Ration Dal a sem hnuah Ration Chana hi a thlawna sem leh turin a ruahman a, he ruahmanna hnuaia Serchhip PDC hnuaia chhungkaw hrang hrangte Ration Chana tur chu nimin khan Serchhip Kudam atang hian pekchhuah a ni leh ta a ni. Ration Chana hi Ration Card pakhat ah thla khat atan Kg. 1 zela semchhuah tur niin tunah hian thla thum (3), July 2020 atanga September, 2020 chhung atan semchhuah niin Ration Card Eng leh a Hring nei ten Chana hi Kg. 3 zel an dawng thei dawn a ni.

Serchhip PDC hnuaiah hian Retailer 24 awmin NFSA hnuaiah hian AAY Ration Card nei chhungkaw 787 leh PHH Ration Card nei chhungkaw 3015 an awm a, heng bakah hian Serchhip District chhung khaw hrang hrangah pawh semchhuah leh tur a ni bawk ang.

Serchhip-a Supply Department hotute chuan tun dinhmunah Serchhip-ah Ration buhfai dinhmun a tha tih sawiin, August thla Ration tur chu pekchhuah fel a nih tawh thu an sawi a, tuna Kudam-a Buhfai chhekkhawl chuan September thla Ration a ala daih thu leh tunah hian Aizawl lam atanga rawn phurh mek a awm thu an sawi bawk a ni.