Village Council Election Observer in Serchhip SP leh DIPRO Office te a tlawh

Village Council inthlanpui neih tura Serchhip District Observer, Robert C. Lalhmangaiha MCS chuan nimin khan Serchhip SP Office leh Serchhip DIPRO Office te tlawhin inthlanna atana an hmalakna leh an inbuatsaihna te a enpui.

Nimin-a Election Observer in Serchhip SP Office a tlawhna ah hian Observer hi Serchhip SP, R. Sathiyasundaram IPS leh Addl. SP. PC. Laltanpuia te chuan lo dawngsawngin Serchhip SP Office-ah inkawmna an nei a, he hunah hian Observer, Robert C. Lalhmangaiha chuan inthlanpui neih tura Serchhip Police te inbuatsaihna zawtin, COVID-19 hri leng avangin a hma aia uluk lehzuala Dan kenkawh a tul dawn thu a sawi a, inthlanna felfai leh thianghlim a awm theih nana theihtawp chhuah turin a sawm bawk a ni. Serchhip SP chuan Polling Station tinah Police Duty indah vek an tum thu leh thawktu indaihloh avanga harsatna an tawh mek thu Observer hnenah hian sawiin, Police Hqrs. lam pawh an biakpawh tur thu leh COVID-19 hri leng avanga hmun tam taka Duty lai Police an neih bawk si avanga harsatna an neih dan te a sawi a, Observer chuan inthlanpui neih tur atana venhimna an ruahman dan te chu tha a tih thu a sawi a ni.

Hemi hnu hian Observer hian Serchhip DC Complex-a District Information & Public Relations Officer (DIPRO) Office chu tlawhin DIPRO, K. Saitluanga chuan a lo dawngsawng a, he hunah hian Observer chuan inthlanna felfai neih a nih theih nan leh mipui ten inthlanna ah kokim taka Vote an thlak theihna turin I&PR Department chu thawktu pawimawh tak an ni tih sawiin, hripui leng kara inthlanna nei tur kan nih avangin mipui ten hri laka him taka Vote an thlak theih nan inzirtirna uar lehzual a pawimawh thu a sawi a. Serchhip DIPRO, K. Saitluanga chuan hemi kawngah hian Press Release an siam te tualchhung chanchinbu ten tha taka an puanzar sak bakah Social Media lamah te pawh a theih anga thehdarh a nih thu sawiin, Polling Day-a Media te tan ID Card tur an buaipui mek thu a lo hrilh a. Inthlan result kimchang Media miten an hriat thuai theih nana ruahmanna siam an tum mek thu a lo hrilh bawk. Observer chuan Serchhip-ah sawrkar leh Media mite inpawh taka hna an thawh thin avanga lawmawm a tih thu a sawi bawk.

Village Council inthlanpui neih tura Serchhip District Observer hian kar kalta lam khan Hrangturzo bial chhunga khaw engemaw zat tlawhin tunkar chhung khan Tuikum bial-a khaw hrang hrang a tlawh leh a, karleh lam khian Thenzawl, Neihloh leh Buangpui te tlawhin Vote thlak ni-ah Polling Station hrang hrang a tlawhkual dawn bawk a ni.

Comments

Chhiar Hlawhte