Hrileng kaihhnawih ah Serchhip mi tam tak chi-ai; mipuite tan hlauhthawn lutuk tur a awmlo

COVID-19 kaihhnawih avangin nimin khan Serchhip leh a chhehvel mi tam tak an chi-ai nasa hle a, amaherawh chu thuneitu ten hma an lak hnuah mipuite tan chi-ai lutuk na tur a awmlo nia thudawn niin chhungkaw thenkhat te chu mahni In lama inkhunghrang tura tih mek an awm bawk.

Thudawn danin COVID-19 hri leng mek avangin nimin khan Serchhip-a IOC Petrol Pump leh Mercy Hospital te chu mipui tlawhpawh theihloh tura khar a ni a. Hetianga khar a nih chhan hi tunkar Thawhtanni khan Serchhip-a PB. Lalzuithanga Filling Station-ah hian State pawn lam atangin Tanky lian dah tur an rawn kal a, he Tanky dah tura rawn kal te hian Mizoram an rawn luh dawnah Rapid Antigen Test (RAT) paltlang vek mah se Serchhip-a he Tanky hlanthlakna a lo puitu, Petrol Pump bul-a khawsa chu a hritlan zui bakah a khua te a sik nia thudawn a ni a, hei vang hian hri leng avanga fimkhur thu ah nimin atang khan he Petrol Pump hi mipuite tlawhpawh theiloh tura khar nghal a ni a, nimin vek khan he damlo leh a chhungte mi 8 chu Rapid Antigen Test hmanga enfiah nghal niin an result hi Official-a tihchhuah la ni lo mah se an negative vek nia thudawn a ni a, hetianga an result a negative avang hian nimin chawhnu atang khan Petrol Pump pawh hi dan pangngai hawn leh nghal a ni bawk.

Hetihlai hian he damlo chhungte zingah hian New Serchhip-a Mercy Hospital (Rural Diagnostic & Research Centre)-a thawkte an awm avangin fimkhur thu ah nimin atang khan Mercy Hospital-ah hian damdawi lei leh damlo kan khap ve nghal a ni bawk a, amaherawh chu an result a chhuah hnuah nimin tlai atang khan he damdawi In pawh hi dan pangngaia hawn chhunzawm ve leh nghal a ni bawk.

Nimin vek khan Serchhip-a Mizofed Office pawh tlawhpawh theihloh tura khar lailawk a ni bawk a, New Serchhip South Village Level Task Force (VLTF) leh Mizofed Serchhip Branch-a thawktute hnen atanga thu kan dawn danin nimin zing khan Serchhip Mizofed-ah hian eirawngbawlna Gas Trip khat a rawn thleng a, eirawngbawlna Gas rawn phurtu Truck Handyman hi COVID-19 hri kai hmuhchhuah nia hriat niin he Motor khalhtu hi hri kai lo nia sawi ni mah se lirthei pakhat-a lo chuang dun tawh an nih avang leh Truck hi rawn khalh tir zui a nih avangin fimkhur thu hla ah New Serchhip Venglai-a Mizofed Serchhip Branch Office hi nimin khan mipui te tlawhpawh theihloh tura khar a ni.

Amaherawh chu hemi chungchang hi Health Department-a thawktute leh VLTF hruaitute chuan chhui zui nghalin he Motor hian August 4, 2020 khan LPG Bottling Plant, Silchar atanga load lain a Handyman hian hri a kai tih hmuhchhuah a nih hnuah Driver hi Thingdawl Polytechnic-ah ni 10 chhung Quarantine niin hemi hnu, tunkar Thawhlehni khan chhuah tirin Nilani-ah a rawn phur leh tih hriat a nih bakah amah hian lehkha pawh felfai takin a rawn nei a, hei vang hian mipuite tan hlauhthawh tur a awmlo nia ngaih niin an motor leh Gas bur phurh te hi damdawi hmanga kah thianghlim a nih hnuah mipuite hnenah semchhuah tura ruahman a ni a, eirawngbawlna Gas a rawn phurh te hi nimin ah sem theih a nih tak loh avangin Vawiin lamah sem tur a ni ang.

Nimin vek khan New Serchhip North VLTF huamchhunga chhungkaw pahnih (2) te chu anmahni In lama inkhunghrang tura tih an ni bawk a, heng chhungkua te hi New Serchhip Kikawn leh Luiralmawi ami te niin chhungkaw pakhat zawk ami hian tunhnaiah Rangvamual lam mi mikhual an nei nia hriat niin pakhat zawk chhungkua ami hian Rangvamual an tlawh nia hriat a ni bawk a. Hei vang hian heng chhungkua te hi mahni In lamah lo inkhunghrang tura tih niin a tul angin Rangvamual lama LLTF te an biak hnuah Sample lak a tul a nih chuan lak sak leh tura ruahman a ni bawk.

Comments

Chhiar Hlawhte