Vathuampui kawng siam mek tihchhiat a ni

Mizoram chhimlam, Chikhurlui leh Vathuampui inkar kawngpui PCC hmanga siam chu a nihna tur anga thawh a nih loh avangin niminpiah khan JAC Vathuampui hmalakna in tihchhiat a ni. JAC Vathuampui in thuchhuah siama an tarlan danin Saibawh leh Vathuampui inkar kawng siam mekah hian Chikhurlui leh Vathuampui inkar hi PCC hmanga siam niin helai chhehvel-a cheng ten kawng tha nei tura beiseina neia nghakhlel taka an thlir laiin Contractor chuan a siam dan tur ang ni lovin hna a thawk tih an hriat thu an sawi a ni.

Thuchhuah siama an tarlan danin he kawngpui hi Rora, Cement leh Balu te inrual khai taka chawhpawlh-a plaster tur anih laiin Rora hmang lovin GSB, Lei leh Cement tlemte chawhpawlhin Plaster hna hi an thawk tih an sawi a. An kawng siam tawh sa pawh Mau leh Nihliap hmang pawha chhunkhawh theih vek a nih bakah Kut pawha hmeh keh theih a nih thu sawiin, hetianga diklo taka hnathawh chu sawrkar bumna leh mipui zahlohna ah an ngaih thu sawiin, sawrkar chu a rang lama hma la tura an ngen thu an sawi bawk.