SEDP hnuaiah Dragon Fruit tanpuina sem a ni

Mizoram sawrkar Flagship Programme, SEDP hnuaiah Dragon Fruit ching tur chhungkaw 95 te hnenah nimin khan sum fai-a tanpuina hmahruai Rs. 30,000/- theuh sem a ni. Dragon Fruit ching tura thlan te hnena tanpuina semna hun Horticulture Conference Hall, Aizawl-ah neih hi Horticulture Development Board Vice Chairman, Prof. F. Lalnunmawia MLA chuan hmanpuiin Chief Minister, Zoramthanga kaihhruai sawrkar chuan inthlan laia a thutiam a theihnghilh lo tih sawiin, SEDP pawh tih hlawhtlin ngei a tum thu a sawi a. Hrileng leh sum leh pai harsatna karah tihfel tur neuh neuhte a awm avangin thil tih zung zung a harsat thu leh chutih rualin a chin hun a tlai mai dawn tawh avangin an inpeih veleh hetiang prog-ramme hi an siam ta tih sawiin, DC lamah te phalna an lak thu a sawi bawk.

Horticulture Development Board Vice Chairman chuan a hmahruai atan Horticulture Department hnuaiah Dragon Fruit ching tur mi 95 thlan an nih thu sawiin, “Hei hi a bultanna a ni a, kan sawrkar chuan a theih dan danin Trade hrang hrangah SEDP hi kalpui zel a tum a, tumkhatah zau takin a cover nghal vek loh pawhin a tahtawla District leh MLA bial hrang hrangah te kalpui chhoh zel kan beisei a ni,” a ti bawk.

He hun kaihruaitu Horticulture Department Director, Dr. Elizabeth Saipari chuan a tirah SEDP-ah Dragon Fruit a telloh thu sawiin, hripui avanga Lockdown a lo nih takah khan, thlai leh ei tur kan mamawhna a lo nasat avangin Chief Minister hnenah SEDP-ah Dragon Fruit hi telh tura an ngen thu leh phalsak an nih thu a sawi bawk.