Chanchin thar thenkhat :

RO Training neih tan a ni

    Village Council inthlanpui neih tura Champhai District chhunga Returning Officer tura ruat te tana Training chu nimin khan Champhai-a I&PR Auditorium-ah neih a ni a, he hun hi Champhai DC leh District Election Officer, Maria CT. Zuali chuan hmanpuiin State Election Commission hnuaiah VC inthlan tum 2 huaihawtna tur a nih thu leh tunkar chhovah chuan inthlan hun tur pawh tihchian a nih a beisei thu a sawi. Champhai DC chuan VC inthlan ah mahni khua ami theuh te RO tura ruat an nih thu sawiin, RO te chu sawrkar hnathawk an nih avangin Party tan lam nei lo tura ngaih an nih laiin Party lam atangin tan lam nei ang tlata hriatna a awm thin avangin fimkhur hle turin a chah bawk. Champhai District-ah hian VC 62 awmin he training-ah hian VC tina RO te an tel a ni.

Mamit-ah pawh nimin khan Village Council inthlanpui-a Returning Officer tura ruat te tan Training hi neih a ni a. He hun hi Mamit DC, Dr. Lalrozama IAS chuan hmanpuiin Village Council Election kan hmachhawn turah inbuatsaihna kalpui zel a nih thu sawiin, helama mawhphurhna neitute chu tha tak leh taima taka thawk turin a chah bawk. Mamit District chhungah hian Village Council 90 awmin RO atan hian mi 95 ruat an ni a, a thawh khatna ah mi 45 te Training tura koh niin a thawh hnihna ah mi 45 dang koh leh an ni anga, midang te hi a tul hun-a koh tura ruahman an ni bawk.

Green-Ag sawiohona nei

Nimin khan Mamit-ah Green-Ag Project hnuaia Technical Support Group (TSG) chu a vawikhatna atan an Chairman leh Mamit DC, Dr. Lalrozama IAS hovin an thukhawm a, he hunah hian Online Video hmangin mithiam ten Green-Ag Project (Global Environment Facility-6) thiltum leh a chanchin tlangpui an sawifiah bawk. Green-Ag Project in a tum ber chu khawvel boruak chhe zel tur veng chung leh ram leilung, sik leh sa, ramsa leh nungchate tichhe lova, Agriculture hnuaia hmalakna thar kalpui niin State panga- Mizoram, Rajasthan, Uttarakhand, Odhisha leh Madya Pradesh-ah te kalpui tur niin Mizoram ah chuan Mamit leh Lunglei District-ah kalpui tur a ni ang.

Hnahthial-ah hri kai hmu

Hnahthial District-ah COVID-19 hri kai hmuh an nih ve tak avangin nimin khan Hnahthial District Task Force on COVID-19 chu nimin khan thukhawm nghalin COVID-19 do kawnga hmalak dan tur an sawiho a, COVID-19 avangin State dang atanga Hnahthial District chhunga haw mi 179 an awm tawh thu leh mi 161 ten Quarantine hun hmang zo tawhin mi 18 chu Quarantine mek an la ni tih he hunah hian tarlan a ni. Hnahthial-a hri kai hmuhchhuah thar hi Covid Care Centre - Hnahthial Damdawi In hlui building-ah dah nghal a ni.

Minister in leimin tlawh

Champhai South bialtu MLA leh Transport Minister, TJ. Lalnuntluanga chuan nimin khan tunhnaia ruahsur nasa avanga Champhai leh a chhehvel-a leimin te chu nimin khan a hmunah a tlawh a, ruahsur nasa vanga Champhai leh a chhehvela chhiat tawhnate sawrkarin a hriatpui thu leh a tawrhpui thu sawiin, duh angin hmalak zung zung theih ni lo mahse tun leh tuna mamawh zualpui angte chu a theih ang zela pek an nih tur thu a sawi bawk. Tunhnaia ruahsur nasa avang khan Champhai Kanan Veng Thlanmual chu a min a, Thlan 49 zet chu hmun him lamah sawn-chhuah ngaiin a awm a ni.

ILP endik turin ngen

Central YMA chuan nimin khan thuchhuah siamin hripui leng avanga ILP pekchhuah hun engemaw tih chhung atana tihtawp lailawk a nih hnuah tun-hnaiah hnamdang hnathawk a inhlawhfa turte Mizo-ram chhung hmun hrang hrangah an pung leh ta deuh ni a hriat a ni tih tarlangin, hei vang hian Branch, Group leh Sub-Hqrs. YMA te chu an huamchhung theuh tha zawka vila Inner Line Permit (ILP) endik runpui pawh tunkar chhunga nei turin an ngen a. Mizo thalai tam zawkte’n kut themthiamna hman tangkai hun atan he hun khirh kan tawh mek hi an hman theih nan tan la thar turin an ngen bawk.

A hranga inthlan neih duh

Mizoram Pradesh Congress Committee (MPCC) chuan Mizoram sawrkar chu Village Council leh Local Council inthlanna nei tura a inbuatsaih mek thu thuchhuah siama tarlangin, Village Council leh Local Council inthlan hi chhan hrang hrang avangin a hranga buatsaih nise tih chu an duhdan a nih thu leh hei hi July 14 khan State Election Commission-ah pawh ziaka an thehluh tawh thu an sawi a. VC leh LC chu a enkawltu leh an thuneihna pawh a hrang a nih avangin inthlanna pawh a rual ni lova, a kar awl awma buatsaih nise an duh tih an sawi a ni.