Tuipuiral-a lirnghing chungchang zirchianna Education Minister hovin sawiho a ni

Lirnghing chanchin zirmi ten tunhnaia Tuipuiral khaw hrang hranga lirnghing tawrh dan an zirchianna chu nimin khan School Education Minister, Lalchhandama Ralte hovin a Pisa-ah sawiho a ni a. Tunhnaia lirnghing avang hian mimal, sawrkar leh Kohhran building 500 vel chu a hmelhemin a chhiat phah nia chhinchhiah a ni.
School Education Minister Pisa-a thutkhawm ah hian Minister chuan Tuipuiral tawrhna chu Mizoram mipuite leh sawrkarin a tawrhpui a, an lam an hawi reng tih a sawi a. Leilung lam zir mithiamte an penchhuak thin chu Tuipuiral-a chengten an thlamuanpui hle a, kan mithiamte hi kan chhuang hle a ni, a ti bawk. School Education Minister hian tunhnaia Tuipuiral-a lirnghinna khaw hrang hrangte hi zan hnih riakin a tlawh kual a, a hmuna chengten an tawrh dan te a thlir bakah lirnghing chanchin zir mithiamte chu a hmun ngeiah an hmanraw neih ang ang nen kala zir chiang turin a sawm a. Mithiam rualte chuan lirnghinna hmun hi chamchilhin an zir zui ta a ni.
Nimin a thutkhawm neih ah hian East Tuipui bialtu MLA, Ramthanmawia chuan lirnghing in Tuipuiral a chhu nawn sek mai chuan mipuite a tibuai nasa tih sawiin, Mithiamte a hmunah rang taka an thleng chho thei nghal erawh a thlamuanthlak tih a sawi a. Mipuite mamawh an sawi apiang sawrkarin a ngaihtuah nghal zel tih sawiin, Minister 4 leh MLA 2 ten an tlawh tih pawh a sawi a, “Mipuite mamawh chi hrang hrang an tihsak nghal zel a, bial chhung manganna a chhawk nasa a, a lawmawm hle a ni,” a ti bawk.
Lirnghinna hmun tlawhtu Geologist-te chuan an thil hmuh dan sawiin, lirnghing a awm fo hian Radon Gas a rawn tichhuak thin a, Radon Gas a lo tam chuan ei leh in a tibawlhhlawh a, hriselna a ti khaw lo nghal thei a, Radon Gas Level hi teh vat theih tul an tih thu an sawi a. Leilung chhungril awm dan Data chu Champhai atangin Keitum thlengin an la a, US Geological Survey-ah thawn niin, heta tang hian leilung khik dan leh inthleh dan te a hriat theih dawn tih an sawi a. Lei khi chat liantham thleng mai thei anga mi thenkhatten an hlauhthawn chu thil thleng mai thei nia an hriat loh thu sawiin, chutih rualin Mizoram hi lirnghing na tak thlen theihna hmun anih avangin khawchhak lirnghing atang hian inhmakhua ngai an tih thu an sawi bawk.
Lirnghing chanchin zir mite hi MZU, MIR-SAC, Zirtiri Science Residential College leh Lunglei College a thawkte an ni a, Zofa Consultancy Services ten In chhia siamthat leh dan tur pawh enin, nimin thutkhawm ah hian Tuipuiral chhung chu Insak dan him kawhhmuh ran tha an tih thu an sawi ve bawk a ni.
Tuna hriat theih chinah Tuipuiral Welfare ten an chhinchhiah danin lirnghingin a tih-chhiat leh a tihhmelhem te chu mimal In 471 leh sawrkar leh Kohhran In 29, a vaiin 500 a ni.

Comments

Chhiar Hlawhte