District 9-a VC leh LC inthlan hun atan August 27, 2020 ruat a ni ta

Mizoram District 9-a Village Council leh Aizawl Municipal Corporation (AMC) hnuaia Local Council inthlanpui chu tun thla ni 27 khian neih a nih dawn thu Mizoram State Election Commission chuan puangin he inthlanna neih tur puan a nih rual hian Election Model Code of Conducts chu hman nghal a ni bawk.

Mizoram State Election Commissioner, Laima Chozah chuan nimin chawhnu dar 2:00 khan ATI Auditorium, Aizawl-ah thuthar thehdarhtute kawmin Mizoram District 9-a Village Council inthlanpui neih hun tur hi a puang a, State Election Commissioner in a puan dan chuan he inthlanna neih tur puan a nih rual hian inthlan chuh tumte tana hming pekluh hun chu hawn nghal niin inthlanna chuh tum te tan hian tun thla, August 11 tlai dar 3:00 thlengin mahni awmna bial-a Returning Officer te hnenah Nomination Paper thehluh theih a ni anga, heng hming pekluh te hi hemi ni tlai dar 3:00 atanga endikin inhnukdawk duhte tan August 13, 2020 tlai dar 3:00 tlengin hun hawn a ni anga, inthlanna a chuh tumte hnenah a tuk-ah Symbol tur semin tun thla ni 27 (Nilaini)-ah zing dar 7:00 atanga tlai dar 5:00 chhungin Vote thlak a ni anga, Vote thlak zawhfel a nih hnu hian Vote tla te hi chhiar nghal tur a ni ang. Engemaw avanga Vote thlak that a tul chuan August 28, 2020-ah Vote thlak leh a ni anga, VC thlantlin thar te chuan September 4, 2020 hmain Executive Body dinin September 7, 2020-ah chuan inthlanna hi zawhfel vek tura ruahman a ni.

Hetianga inthlan hun tur puan a nih rual hian inthlanna neihna tur- Aizawl, Lunglei, Serchhip, Champhai, Mamit, Kolasib, Saitual, Khawzawl leh Hnahthial District-ah te chuan Model Code of Conducts chu hman nghal a ni a, hei hian Political Party zawng zawng, Inthlan chuhtu Candidate, Minister, MLA leh VC inthlanna a inhnamhnawih Public Servant te a huam a. Village Council Term hi kum nga (5) atan a ni ang.

Village Council inthlanpui-a Vote thlak turte tan hian Election Commission of India in a siam EPIC ken tur niin a neilo tan an nihna chiang taka hriat theihna Identity Card dang ken ngei a ngai dawn a ni.

Tun tuma AMC huamchhunga Local Council inthlanna neih turah hian Local Council 83-ah Seat 545 awmin Hmeichhe tana Seat hauh chu 148 niin General-ah Seat 397 a awm a, Vote nei thei mi 2,18,758 an awm bawk. Village Council 558-a inthlanna neih turah hian Seat 2464 awmin General-ah Seat 1831 awmin Seat 633 te chu Hmeichhia te tana hauh a ni a, Vote nei mi 4,54,180 an awm a ni.