Sum lama harsatna nei te Quarantine-na senso sawrkar in a tum sak vek dawn

Chief Secretary, Lalnunmawia Chuaungo chuan Quarantine Centre-a awm te zingah sum leh pai-a harsatna nei te Quarantine senso leh thil tuldang te chu sawrkar in a tum sak vek ang tih a sawi. Mipuite hnena TV kaltlanga nimin a thuchah a sawina ah Chief Secretary chuan Quarantine Centre-a awm ten an awm man te, an ei leh in man te leh COVID Test man te mahni intum tura Circular an tihchhuah chungchangah zawhna an dawng nasa viau tih sawiin, Chief Minister in a duhdan ah chuan sum leh pai-a harsatna nei te chu sawrkar in a tum sak vek ang tih a nih thu leh chu chu tuna kalpui dan tur a nih thu a sawi a. Inkhuahkhirhna thlahdul a nih deuh hnuah Mizoram atangin sumdawng te, sum lama harsatna neilo mihausa te State pawn-ah an zinchhuak tih sawiin, heng mite an rawn haw hnua Quarantine senso leh Test man te sawrkar in vantlang sum a lo tih sak vek thin chu ‘A awm tawh love, sum leh pai-a harsatna neilo te hi chuan in tum ve tawh se’ tih chu rawtna tam tak an dawn thu leh chumi dung zui-a he Order hi tihchhuah a nih thu a sawi a. Sum leh pai-a harsatna nei te chuan DC te hnenah an sawi anga, an hnathawh leh an harsatna te an thlen hnuah DC ten lo en sakin engmah chawi lova awm tir theih an nih dawn thu a sawi bawk.

Chief Secretary chuan Central Armed Paramilitary Forces (CAPF) te chungchang pawh sawiin, Mizoram-a CAPF awm te chu Assam Rifles te, BSF te, CRPF leh Army Unit tlem an nih thu a sawi a, heng ho atang hian tunhnaiah COVID-19 hri kai thahnem tawk tak hmuhchhuah a nih thu sawiin, a percentage-ah phei chuan Civilian te aiin an sang zawk nghe nghe tih a sawi a. Anni hi lut leh chhuak reng an nih avangin Mizoram sawrkar pawhin remruatna te siamin Lunglei leh West Bengal-a awm Battalion inthlak turte pawh thulh leh rih a nih thu a sawi. Chief Secretary chuan Paramilitary Forces te chu discipline tha tak nei leh Quarantine Centre te pawh uluk taka enkawl tura ngaih thin an nih laiin tunhnai deuha case tam tak an neih hnuah DC te leh CMO te anmahni District theuha Paramilitary Forces te hmun enfiah tur leh report pe tura tih an nih hnuah Assam Rifles ten Facilities an neih that laiin BSF te erawh Facilities an nei thalo khawp tih a sawi a. Anni ho tan hian Quarantine-na tur leh hri kai enkawlna turte pawh ruahmanna siam sak tak an nih thu bakah lo lut zel turte pawh thulh tawh turin leh State sawrkar in phalna a pek bik te chauh lo chu lo lut tawhlo tura tih an nih thu a sawi bawk.