Mizoram-a hri kai hmuhchhuah tam ber ni thleng

Inrinni (August 1, 2020) khan Mizoram-ah COVID-19 hri kai mi 55 zet hmuhchhuah niin hei hi Mizoram-ah nikhat-a hri kai hmuhchhuah an tam ber ni a ni. Inrinni khan ZMC Laboratory-ah hian Aizawl leh Serchhip bakah BSF, CRPF, Assam Rifles leh ZMC-a damlo enkawl mek te atangin Swab Sample 194 enfiah niin heng atang hian COVID-19 hri kai mi 54 hmuhchhuah an ni a, heng hri kai hmuhchhuah zinga 46 zet chu Force (BSF,CRPF leh Assam Rifles) mi leh sa, State pawn atanga rawn lut te an ni a, mi 44 te chu Quarantine Centre-a awmlai niin midang pahnih te hi ZMC-a enkawllai an ni thung. Inrinni-a ZMC Laboratory-a hri kai hmuhchhuah dang mi 8 te hi Civil mi an ni thung a, mipa 7 leh hmeichhia pakhat niin Aizawl District mi vek an ni a, mi 6 te hi State pawn atanga rawn haw niin midang pahnih te hi hri kai hmuhchhuah tawh te nena lo inhnimhnaih atanga kai an ni thung.

Inrinni vek khan Lunglei-a TrueNat khawl-ah Sample 28 enfiah niin heng atang hian hri kai mi pakhat hmuhchhuah a ni bawk a, hri kai hmuhchhuah hi BSF sipai kum 58 mi, Bihar atanga Mizoram-a rawn lut leh Vanhne-a Quarantine lai niin hri kai lanchhuahna neilo a ni bawk.

Heti hian nimin thleng khan Mizoram-ah Sample 21,294 enfiah ni tawhin heng zinga a tam ber, 19,767 te chu ZMC Laboratory-a enfiah niin hri kai hmuchhuah 468 an tling tawh bawk a, hri kai hmuhchhuah zinga a zat ve thuak, 230 (49.14%) chu Forces (BSF/AR/NDRF etc.) mi leh sa niin midang 238 (50.85%) chu Civil mi an ni thung. Mizoram-a hri kai hmuhchhuah atang hian mi 258 te chu enkawl dam ni tawhin hri kai hmuhchhuah atanga zaa 55.12 chu enkawl dam an ni tawh a, tunah hian hri kai enkawllai mi 210 an la awm mek a ni.

India-ah COVID-19 hri kai nuai 17 an tling tawh :

India rama COVID-19 hri kai hmuhchhuah chuan nuai 17 an chuang ta a, ni 4 chhung a zawnin nitin hri kai mi sing nga chuang hmuh-chhuah an ni bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 4,63,172 enfiah niin heng atang hian hri kai 54,735 hmuhchhuah an ni a, heng te nen hian India rama hri kai hmuhchhuah chu 17,50,723 tling tawhinni 4 chhung chu nitin hri kai mi sing nga chuang hmuhchhuah an ni tawh a, hri kai hmuhchhuah hi an la pung zel niin a lang.

Hetihlai hian India rama hri kai enkawl dam pawh pung zelin darkar 24 kalta chhung khan mi 51,255 te chu enkawl dam an ni a, heng te nen hian hri kai enkawl dam hi 11,45,629 tling tawhin hei hi hri kai hmuhchhuah atanga chhutin zaa 65.43 a ni a. Darkar 24 kalta chhung khan nunna chan mi 853 awmin hri kai zinga nunna chan hi mi 37,364 an ni bawk a, hei hi hri kai hmuhchhuah atanga chhutin zaa 2.13 a ni.