Latest News

Session-a sawrkar chetfuh lohna hailan hlauh avanga inthlan kaltlangpui-ah ngai

ZPM Vice President, Lalthansanga (Chatea) chuan thla thar September ni 1 atanga Assembly Session neih turah sawrkar chet fuhlohna tam tak hailan a ni dawna hriatna avangin inpeihlo chunga inthlan kaltlang pui luih a nih thu a sawi.

Nimin-a Aizawl-a thuthar thehdarhtute a kawmna ah ZPM Vice President, Lalthansanga (Chatea) chuan nimin-a Local Council leh Village Council inthlanna lo awm tur hi COVID-19 hripui in min chimbuai nasat lai a nih avangin ZPM chuan a hun an tih loh thu tun thla ni 8 khan ZPM President, Lalliansawta chuan Press Conference neiin a sawi tawh tih a sawi a. BJP leh Congress party pawhin inthlan hun sawn hlat rawtna an thehlut bawk tih sawiin, ZPM Party chu an dinna ngaiah an la ding reng tih a sawi.

ZPM Vice President chuan heti khawpa inthlan inpeihlo chunga inthlan kaltlang pui luih a nihna chhan chu thla thar September ni 1-a Assembly Session a awm dawn avangin sawrkar chet fuhlohna tam tak hailan a ni dawna an hriat avangin hemi hma ngeia inthlan buatsaih ngei turin sawrkar a inbuatsaih chuk chuk nia an hriat thu sawiin, hetianga inthlan kaltlang luih pui a ni chungin AMC Area-a Veng 24-ah Election an sawn hlat thu a sawi a, chung zinga Veng 22 chu ZPM MLA bial a mi an nih thu leh Veng 2, Dawrpui Vengthar leh Thuampui chiah Ruling Party MLA bial a nih thu a sawi a. Aizawl-a Veng pakhat YMA President-in Election lam atangin Phone a dawng tih sawiin, ‘In Veng in Election in nei thei angem?’ tih an zawt a. “Neih theih lohna chhan tur kan nei lo,” tia a chhang chungin sawn sak an ni ta tho tih a sawi bawk.

He hunah hian ZPM Secretary General, K. Sapdanga pawhin Electoral Roll pawh SEC chuan ala peihlo nasa tih sawiin, “Electoral Roll hi July 28, 2020-ah tihchhuah a ni a, hemi hnu hian nasa taka khawih danglam a ni a, August 26, 2020, campaign hun tawp ni-ah Electoral Roll an khawih danglam chu a copy chu political party te min pe thei chauh a, Election Official te kawl leh party te min pekah Serial number inanglo a tam hle,” a ti bawk.

Hemi hma nizan hmasa khan ZPM General Hqrs. chuan State Election Commissioner hnenah lehkha thehlutin Khua leh Veng 28-ah hri leng avanga inthlan hun tur sawn a nih thu leh inthlan neih luihna Khua leh Veng-ah te pawh hian COVID-19 hripui laka inven chu a ngaih tho avang leh Local Body inthlan rual lo zung chuan Ruling Party leh Eptu Party-te lakah hamthatna inang lo a siam theih thu tarlangin, democracy zahawmna a tibawrhbang thei tih an tarlang a. Hei vang hian inthlanna neih tur hi a puma thulh an duh thu leh a ruala inthlan an duh thu tarlangin, a rual lova inthlan buatsaih a nih pawhin Vote chhiar hun tur tal a ruala ruat turin an ngen a ni.

Comments

Popular News (Last 30 Days)