Mizoram-ah COVID-19 hri kai 7 hmuh belh leh an ni

Niminpiah khan Mizoram-ah COVID-19 hri kai mi 7 hmuh belh leh niin Mizoram-a hri kai hmuh zawng zawng chu 974 an tling ta.

Niminpiah a Mizoram-a COVID-19 hri kai hmuh belh zinga 4 te hi ZMC Laboratory-a Sample enfiah zing ami niin midang 3 hi Lunglei TrueNat khawl-a hri kai hmuh an ni thung a, niminpiah khan ZMC Laboratory-ah hian Sample 669 enfiah niin hri kai hmuh 4 te hi Aizawl District mi vek niin mipa leh hmeichhia 2 ve ve an ni a, Mipa 2 hi Quarantine Facility a awm lai an ni a, hmeichhia 2 hi hri kai nen lo in kawm hnaih atanga kai, Home Quarantine lai niin Mission Veng ami leh Sawleng khua ami te an ni thung. 

Nimin-a ZMC Laboratory-a Sample enfiah zingah hian tunhnai hri kai lo hmuhchhuah tawh ten an kawm hnaih chhuina atanga sample lak Aizawl College Veng 7, Ramhlun South 57, Darlawn 44, Sawleng 94 leh Melriat 7 an tel a ni.

Lunglei Civil Hospital TrueNAT Laboratory-a COVID-19 positive hmuhchhuah thar 3 hi mipa vek, kum 22, 25 leh 27 a upa niin, Jhar-khand atanga lo lut 2 leh West Bengal atanga lo lut pakhat an ni a, Quarantine Facility a awm mek niin Lunglei-a mi 2 leh Tlabung mi 1 an ni.

Hetihlai hian nimin khan Mizoram hmun hrang hranga hri kai enkawl mi 27 te chu damin chhuahtir an ni a, Thingdawl CCC atangin mi 26 chhuahtir niin heng te hi tunhnaia Mizoram-a rawn lut Truck Driver leh Handyman te an ni a, Then-zawl CCC atangin mi pakhat chhuahtir a ni bawk.

Heti hian nimin thleng khan Mizoram-ah COVID-19 hri kai hmuhchhuah chu mi 974 an tling ta a, heng te hi mipa 802 leh hmeichhia 172 te an ni a, mi 500 enkawl dam ni tawhin mi 474 te chu enkawl mek an ni bawk. Aizawl District-ah hri kai enkawllai tam berin mi 310 an la enkawl mek a, Kolasib District-ah mim 107 enkawl niin Khawzawl leh Saitual District-ah te erawh enkawllai an awm tawhlo thung.

Comments

Chhiar Hlawhte