Mizoram District 9-a VC leh LC inthlanna neih turah LC 20 leh VC 8-ah inthlan theih a ni dawn rihlo

Mizoram District 9-ah Vawiin hian Local Council leh Village Council inthlanna neih turin ruahmanna siam ni tawh mah se COVID-19 hripui leng mek avangin Local Council 20 leh Village Council 8-ah te chuan inthlanna hi neih theih a ni rih dawnlo thung.

Mizoram State Election Commission (SEC)-a hotute chuan Vawiin-a Village Council leh Local Council inthlanna neih tur atan inpuahchahna peihfel a ni tawh tih sawiin, State Election Commissioner, Laima Chozah chuan “Hma lam hun kan hre lo, democracy ram kan ni a, chuvangin, inthlan buatsaih a ngai a ni,” a ti a, COVID-19 do in Health Department-in theihtawp an chhuah thu leh Contact tracing-te neiin, a kai chhawng thei tur awma ngaihte chu endik zel an nih thu sawiin, Inkaichhàwn hlauhawmna deuh hmunte chu Containment Area-ah puangin COVID-19 vanga Containment Area-a DC-te'n an puanna Khua leh Veng-ah chuan inthlan buatsaih a ni dawn rih lo tih a sawi bawk.

Hetianga State Election Commission hotu ten an sawi hnu nizan hmasa khan Mizoram State Election Commission chuan thuchhuah siamin Mizoram-a Village Council 7 leh Aizawl khawpui chhunga Local Council pahnih-ah te chuan inthlanna neih tura lo ruahman tawh chu a hun sawn (Defer)/tihkhawtlai a ni tih tarlangin, heng te hi Sawleng Village Council, Darlawn-a Village Council pathum (3), Melriat Village Council, Hualngohmun Village Council leh Kelsih Village Council bakah Chaltlang Lily Veng Local Council leh Ramhlun South Local Council te an ni.

Hemi hnu nimin khan Mizoram State Election Commission chuan thuchhuah siam lehin Local Council 18 leh VC pakhat-ah te inthlan hun hi sawn a nih thu a puang leh ta, heng te hi Mual-lungthu Village Council bakah Aizawl khawpui chhunga Venghnuai, Bungkawn, College Veng, Republic Vengthlang, ITI Veng, Bawngkawn, |huampui, Bungkawn Vengthar, Nursery Veng, Khatla, Ramhlun North, Ramhlun Vengthar, Ramhlun Sports Complex, Durtlang, Durtlang North, Maubawk, Bawngkawn South leh Dawrpui Vengthar Local Council te an ni a. Mission Veng LC pawh inthlang lo turin nizan khan thutlukna siam a ni bawk nia thudawn a ni.

Comments

Chhiar Hlawhte