Serchhip-a thuthar thehdarhtu ten khaw 2-a Vaimim chinna hmun te an tlawh

MJA Serchhip District member te chuan nimin khan Hualtu leh Hmawngkawn khuaa Vaimim chinna hmun tlawhin kum hmasa aia tam zawk thar theih an beisei thu kuthnathawktu chuan an sawi.

Nimin-a heng khaw pahnih a Vaimim chinna hmun tlawhtu MJA member te hi Farmers Interest Group (FIG) hruaitu ten an lo dawngsawng a, Hualtu khuaa nikum a Vaimim chingtu hlawhtling ber, K. Malsawmtluanga te chuan nikum ah Vaimim chi kg. 15 an chin thu leh quintal 32 an thar thu sawiin, heng an Vaimim tharchhuah te hi a ro in Kg. ah Rs. 15/- hisapa an hralh thu an sawi a, kumin ah kg. 23 ching lehin sawrkar in man sang zawkin lei sak thei se an duh thu an sawi a. Nikum lamah Fall Army Worm (FAW) avanga harsatna an tawh thu sawiin, kumin hian harsatna tawk bawk mah se kum hmasa ai chuan alo hmachhawn dan an thiam tawh thu an sawi a. Agriculture Department a thawktu te pawhin an Vaimim hmun chu an vilpui reng thu leh an mamawh te pawh an ngaihtuah sak zel thu an sawi bawk.

Serchhip-a Agriculture Department hotute chuan kumin hian Serchhip District chhung khaw 36 ah Vaimim an chin thu sawiin, heng zinga khaw 7 chu SEDP hnuaia hmalakna leh khaw 29 chu RKVY-Raftaar hnuaia hmalakna a nih thu an sawi a. Serchhip District pumah hian Vaimim chingtu chhungkaw 650 vel awmin Lockdown avanga ching zui mumal ta lo leh Tam hlauh avanga Buh ching leh ta te pawh an awm thu an sawi a. Vaimim chi kg. 80 vel an semchhuah thu an sawi bawk. Nikum a Vaimim ching zingah chhungkaw 250 velin an tharchhuah an hralh thu sawiin, quintal 1000 vel an thar thu an sawi a, kumin hian quintal 3000 vel thar tura hma an lak thu pawh sawiin, an tlin ngei an beisei thu an sawi bawk.

Heng Vaimim tharchhuah te hi a ro hnuah a kawm in Kg. ah Rs. 15/- hisapa an lei sak thu sawiin, hei hi an mal vek hnuah ran chaw siamna hmunah Kg. ah Rs. 18/- hisapa an hralh thu an sawi a. Vaimim chingtute hnenah hian Vaimim chi, rannung thahna hlo leh a kahna (Sprayer) bakah a pho ro na tur Silpauline an pek thu an sawi a, FIG te hnenah Vaimim nuaina khawl pek leh tum an nih thu sawiin, Vaimim chinna hmunah hian kumin a thar leh hman turin Behliang leh Bekang ching turin a chi sem leh tum a nih thu an sawi bawk.