Serchhip-ah MCC inhrilhhriatna neih a ni

Village Council inthlanpui lo awm tur atan nimin khan Serchhip DC Meeting Hall-ah Model Code of Conduct chungchang inhrilhhriatna hun buatsaih niin he hunah hian Serchhip District chhunga Political Party hrang hrang aiawhte, NGOs Coordination Committee aiawh te, MJA leh MPF aiawhte an tel a ni.

Model Code of Conduct inhrilhhriatna hun kaihruaitu Serchhip District Election Officer, Kumar Abhishek chuan inthlanna thianghlim leh felfai tak a awm theih nana thawhpuiah kalkhawmte chu sawmin, inthlanna dan awmte leh hripui leng meka kan himna tura dan awm te zawm chunga engkim kan tih a tul thu a sawi a. Tun hma atang tawhin Mizoram chu inthlanna boruak muanawm a neih thin avangin a hmingtha thin tih sawiin, chu hmingthatna chu chhawm nung zel tura kan inbuatsaih a tul thu a sawi a. MPF, NGOs leh MJA te pawh hun hmasa lama sawrkar an thawhpuina tha tak te chhunzawm zel turin a ngen bawk.

Bawrhsap chuan inthlanpui neih tur atana State Election Commission in hunbi a ruat hrang hrangte pawh sawifiahin, hriatchian loh leh zawhfiah duh an neih apiang District Election Office-ah zawt thin turin a chah a, tanpui turin an inpeih reng tih a sawi bawk.

He hunah hian Asst. District Election Officer, Vanlalhmachhuana chuan Village Council inthlan chhunga hman tur Model Code of Conduct (MCC) sawifiahna a nei a, Model Code of Conduct bu hi kalkhawm te hnenah sem vek a ni. Sawifiahna a neih hnua Serchhip District MCC Team Leader, Malsawmtluanga, PD, DRDA chuan MCC-a pawimawh zual te a sawifiah bawk a. Khawtin ah insenso tlem leh boruak dai nuam taka inthlanna kalpui theih nia a hriat thu sawiin, MCC Dan te zawm thaa, in umzui ngai lova hmala turin a ngen bawk a ni.

Serchhip District Add. SP, PC. Laltanpuia pawhin Village Council inthlanna boruak nuam leh muanawm a awm theih nana thawh-puiah he huna tel te chu a sawm a. Vote thlak nia Social Distancing kengkawh tha tur leh Social Media hman dana fimkhur turin he huna tel te chu a chah bawk a ni.

Nimin-a he hun hman ah hian Serchhip District bikah MGNREGA hna, August thla chhunga thawh tur chu inthlan puan hmaa lo tihfel sa vek tawh, hna kal lai a nih avanga thawh chhunzawm a nih tur thu tarlan a ni bawk a. Zawhna leh chhanna hun hman a ni bawk.

He hunah hian Political Party, NGO leh MPF aiawhte bakah MCC Team Serchhip District-a member te, Serchhip SP, R. Sathyiasundaram IPS leh SDO (Sadar), C. Lalduhzuali bakah sawrkar mi pawimawh te an tel bawk a ni.