PM-GKAY hnuaia buhfai sem tur ruahman fel

Mizoram sawrkar chuan PM-GKAY hnuaiah July, 2020 chhunga Serchhip District chhunga Ration buhfai a thlawna sem turin quintal 782.05 a rawn ruahman leh tawh.

Serchhip DCSO Office atanga thu kan dawn danin Directorate of Food, Civil Supply & Consumers Affairs Department chuan AAY leh PHH (NFSA) beneficiary te tan sawrkar laipui Scheme, PM-GKAY hnuaia a thlawna Ration buhfai sem tur hi a rawn ruahman a, PM-GKAY hnuaiah hian AAY leh PHH (NFSA) beneficiary te hian mi pakhat zelah Ration buhfai hi a thlawnin Kg. 5 an dawng thei dawn a, hei hian July 20, 2020 hmalam zawnga Ration Card siam chin te a huam dawn a ni. 

Serchhip PDC hnuaiah hian Fair Price Shops (FPS) 24 awmin AAY Ration Card nei 787 awmin mihring 2602 an awm a, heng mite tan hian buhfai quintal 130.10 sem tura ruahman a ni a. PHH Ration Card nei 3015 awmin mihring 13,039 an awm bawk a, heng mite tan hian buhfai quintal 651.95 ruahman niin a pumpui-ah AAY leh PHH-ah hian Ration Card 3802 awmin mihring 15,641 an awm a, heng mite tana buhfai a thlawna sem tur hi quintal 782.05 a ni ang.

Hetihlai hian August, 2020 atan AAY, PHH leh Non-NFSA Ration buhfai sem tur pawh allocation siam fel a ni tawh bawk a, Ser-chhip PDC hnuaiah hian AAY leh PHH bakah hian Non-NFSA Ration Card-a chung mi 11,612 an awm bawk a, August thla Ration buhfai hi a thlawna sem tur ni lovin AAY chhungkua te chuan buhfai Kg. 35 chu Kg. ah Rs. 3/- hisap in an lei anga, PHH Ration Card nei te chuan mi pakhat tan Kg. 5 zel Kg ah Rs. 3/- hisap in an lei thei dawn bawk a, a hma lamah Kg. 1 Rs. 15/- hisap-a Kg. 3 an lak belh thin chu August thla hian an la tel thei dawnlo thung a ni. Non-NFSA Ration Card nei te hian Kg. khat Rs. 15/- hisap in mi pakhat tan Kg. 8 zel an la thei dawn bawk a ni.