Serchhip-a Nursing School chu tunkar chhungin BSF tana CCC atan peihfel hman tum a ni

Serchhip-a Nursing School sak zawh tawh, la luah loh chu COVID Care Centre (CCC) atan ruahman mek niin tunkar-ah zawhfel hman beisei a ni. Inrinni-a Mizoram-a Swab Sample enfiah atangin hri kai mi 55 zet hmuhchhuah an nih avangin nimin khan Health Minister, Dr. R. Lalthangliana hovin Aizawl-a SAD Conference Hall-ah Emergency Meeting neih a ni a. He hunah hian Dr. R. Lalthangliana chuan nikhat thil thuah COVID-19 vei pung thur thur thei dinhmunah kan din avangin COVID-19 veite enkawlna tura ruahman sa, COVID Care Centre (CCC), Dedicated Covid Health Centre (DCHC) leh Dedicated Covid Hospital (DCH) te hian min dawl zo dawnlo tih sawiin, ngaihtuahna uluk taka kan sen a tul bakah Para-Military Force te awmdan tur pawh ngaihtuah a pawimawh dawn thu a sawi a. District 10-a dah tur Truelab Quattro Real Time Quantitative Micro PCR Machine pawh tunkar chhung hian a rawn thlen beisei a nih thu a sawi bawk.
He huna tarlan a nih danin Aizawl-a COVID Care Centre hrang hrang- Tribal Art Centre, Tanhril (khum 50 awmna), Beraw CCC (khum 39 awmna), Zokhawsang CCC (khum 46 awmna, Assam Rifles ho inenkawlna), Multipurpose Centre, ITI (khum 49 awmna) ruahman fel tawh a nih thu tarlan a ni a. Synod Camping Centre, Neihbawih chu khum 80 vel dah theih tur beisei niin tunah hian a enkawltute nen indawr mek a nih thu sawilan a ni bawk. Heng bakah hian Thenzawl-a AYUSH Hospital (khum 40 awmna) leh Lengpui-a AYUSH Hospital (khum 8 awmna) te chu CCC atan hman an ni bawk.
Serchhip-a Nursing School sak zawh tawh la luah loh chu CCC atan ruahman mek a nih thu he hunah hian tarlan niin tunah hian chei that mek a ni a, tunkar chhung hian zawhfel beisei niin khum 100 awm thei tura ruahman a ni. Paramilitary Force leh Civil mite Covid Care Centre khat-a dah pawlh tawh loh tura ruahmanna siam niin Serchhip-a Nursing School hi BSF dahna bik atan ruahman niin, AYUSH Hospital, Thenzawl leh Tribal Art Centre, Tanhril chu Paramilitary-Force leh sipai dang COVID-19 veite dahna tura ruahman niin, Zokhawsang-ah Assam Rifles ho inenkawlna atan hman tur a ni anga, Beraw CCC leh Multipurpose Centre, ITI te chu Civil mi hri kai enkawlna atan hman tur a ni thung ang.

Comments

Chhiar Hlawhte