Serchhip District-ah hri kai enkawl dam awm zel

Serchhip District chhunga COVID-19 hri kai enkawl zingah Inrinni khan mi 3 te chu dam-a chhuahtir niin nimin khan midang pakhat chu chhuahtir leh a ni bawk. July 21-a ZMC atanga Thenzawl COVID Care Centre (CCC)-a hri kai enkawl tur an rawn dah zinga mi 3 te chu hri an kai tawhloh tih nemngheh a nih hnuah Inrinni khan CCC atang hian chhuahtir an ni a, heng mite hi mipa puitling pahnih, BSF leh Assam Rifles mi pakhat ve ve bakah mipa naupang kum 12 mi, Aizawl District-a cheng a ni.

Serchhip Tarpi tlang DCHC-a hri kai enkawl dam tawh mi pakhat pawh nimin khan DCHC atang hian chhuahtir a ni bawk a, ani hi Civil mi, Nagaland atanga rawn haw a ni thung.

Hetihlai hian  Serchhip Tourist Lodge-a khunghran mek te Rapid Antigen Test (RAT) hmanga an Sample enfiah ah COVID-19 hri kai mi pakhat hmuhchhuah niin amah hi kum 27-a upa, Assam Rifles Jammu & Kashmir atanga rawn haw leh a rawn haw atanga Tourist Lodge-a amah-a khunghran nghal a ni a, COVID-19 symptoms nei niin hri a kai tih finfiah a nih hnu hian Serchhip Tarpi Tlang SIRD hmun-a Dedicated COVID Health Centre (DCHC)-ah dah nghal a ni.

Serchhip District-ah COVID-19 hri kai enkawlna hmunah Inrinni khan mi 4 dahluh thar awmin heng mite hi ZMC atanga Thenzawl CCC a rawn dah an ni a, heti hian Serchhip District-ah hri kai enkawllai mi 12 awm mekin Thenzawl CCC-ah mi 11 leh Serchhip DCHC-ah mi pakhat an ni a. Sawrkar in inkhunghranna hmun a siam-a inkhunghrang mi 58 awmin Inrinni khan Thenzawl Tourist Lodge-a inkhunghrang mi pakhat chu RAT hmanga enfiah niin hri lakah a fihlim tih nemngheh a ni a, Inrinni vek khan ZMC Laboratory-ah Sample enfiah tur 9 thawn niin heng zinga 7 te hi hri kai enkawllai, Sample enfiah nawn turte niin an zingah hian hri kai hmuhchhuah thar an awmlo bawk a ni.