Serchhip-a NDD hman dan tur Bawrhsap hovin sawiho

Karleh Thawhtanni atanga rampum-a National Deworming Day (NDD) hman tur chu Serchhip-ah pawh hman tur niin nimin chawhnu khan Bawrhsap hovin a hman dan tur sawiho a ni.

Serchhip DC’s Meeting Hall-a District Coordination Committee on National Deworming Day thutkhawm hi Serchhip District Bawrhsap leh Committee Chairman ni bawk, Kumar Abhi-shek chuan kaihruaiin Serchhip CMO, Dr. Laldawng-liana Sailo chuan National Deworming Day chu kumtin vawi hnih hman thin a nih thu leh kumin ah pawh February thla khan an lo hman tawh thu a sawi a ni.

Serchhip CMO chuan National Deworming Day-ah hian kum khat atanga kum 19 te Rulhut hlo (Albendazole Tablet) pek thin anih thu leh tun tumah pawh hian pek leh tur a nih thu sawiin, hun dangah chuan School leh Anganwadi Centre-ah te pek thin ni mahse tun tumah erawh hri leng avanga School leh Anganwadi Centre te hawn a nih rihloh avanga harsatna a awm thu a sawi a, hei vang hian kumin hian Accredited Social Health Activist (ASHA) ten In tinah kal chilhin Rulhut hlo hi an pek dawn thu leh hemi tur hian Serchhip District chhung khaw tina Village Level Task Force te hnenah pawh lehkha siam a nih tawh thu a sawi bawk. Tun tuma National Deworming Day-ah hian Serchhip District chhunga kum 1 atanga kum 19 mi 21,016 te hnenah Rulhut hlo hi pek tura ruahman a ni.

Rulhuthlo (Albendazole Tablet) hi nau-pang kum 1-2 te tan mum chanve (200mg) a pek tur niin kum 2-3 te chu mum khat (400mg) a pek tur a ni thung a, damdawi ti sawm-a tui thianghlim nen chawhpawlh-a pek tur a ni ang. Kum 3-19 inkar chu mum khat (400mg) a pek tur niin dam-dawi chu seh sawmtir tur a ni thung a, damdawi ei zawh hnuah tui thianghlim intir ngei ngei tur a ni. Naupang damlo emaw damdawi ei lai nei chu Rulhuthlo hi pek loh tur a ni.

Comments

Chhiar Hlawhte