Serchhip-ah Vawk, Vawksa leh Vawksa atanga siam lakluh khapna bawhzui dan tur sawiho a ni

Mizoram Chief Secretary leh State Disaster Management Authority-a State Executive Committee Chairman ni bawkin Mizoram-a Vawk leh Vawksa atanga thilsiam lakluh khapna thupek a siam bawhzui dan tur chungchang sawihona nimin khan Serchhip-ah neih a ni.

Serchhip DC Meeting Hall-a he sawihona nimin chhun-a neih hi Serchhip District Bawrhsap, Kumar Abhishek chuan kaihruaiin Bawrhsap chuan tunhnaiah India ram hmarchhak State thenkhat ah African Swine Fever (ASF) hri a len avangin Mizoram sawrkar chuan State leh ram thenawm atanga Mizoram-a Vawk, Vawksa leh Vawksa atanga thil siam lakluh a khap thu a sawi a, hei bakah hian a hma atangin Serchhip District-ah pawh Vawk, Vawksa leh Vawksa atanga thil siam reng reng lakluh khapna thupek tihchhuah a nih tawh thu a sawi a. Tun dinhmunah Mizoram-ah African Swine Fever hi ala rawn lut lo nia a lan avangin he khapna thupek siam hi theihtawpa bawhzui a tul thu a sawi bawk.

He thutkhawm ah hian Serchhip DVO, Dr. C. Zarzokima chuan African Swine Fever (ASF) chungchang hi sawifiahin he natna lanchhuah dan leh a hlauhawm dan te a tarlang a, he hri avang hian Assam State-ah Vawk 17000 vel thi tawhin, Arunachal Pradesh-ah Vawk 4000 vel an thi tawh tih a sawi a. Thla hnih kalta vel atang khan Meghalaya-ah hmuh ve leh niin Vawk 70 velin an thih pui leh tawh tih a sawi a. Mizoram-ah la hmuh ni chiah lo mahse invenna kalpui a nih dan a tarlang bawk. Serchhip District bikah inbuatsaihna kalpui dan te sawiin, kumin May thla khan District Rapid Response Team din a nih tawh thu a sawi bawk.

He Meeting hian Serchhip District-ah he hri a lo luh lohna tura hmalak dan tur hrang hrang relin District Magistrate in Vawk, Vawksa leh Vawksa atanga thilsiam lakluh khapna thupek a siam chu khauh zawka kenkawh nise an ti a, a bik takin ramri hnaih a Village Level Task Force (VLTF) Duty te chu hemi kawngah hian nasa zawka hma la tura ngen an rel a. He natna hi Sanghal lam hi pawhin an kai theih avangin Forest Department pawhin Sanghal awmna hmun lo zirchiangin, Vawk nen an intlatpawlh loh nan hma lo la se an ti bawk.

He Meeting-ah hian Serchhip-a ran talhna hmun, Slaughter House chungchang pawh sawilan niin tuna hman theihloha a awm chhan te pawh sawilan a ni a, Dan lova State leh District pawn atanga Vawk lakluh man a nih chuan helai hmun hi a dahna tur atan hman tura ruahman a ni bawk. Nimin-a Meeting-ah hian sawrkar Department hrang hrang leh NGO bakah ramri ven hna thawktu BSF leh Assam Rifles aiawhte pawh an tel bawk a ni.