Serchhip District-a Vote nei ten Vote an thlak theuh theih nan ruahmanna siam a ni

Serchhip District chhunga Vote nei zawng zawng ten naktuk-a Village Council inthlanna neih turah Vote an thlak theuh theih na turin ruahmanna siam a ni.

Hemi chungchanga Serchhip District Bawrhsap leh District Level Task Force on COVID-19 a Chairman ni bawk, Kumar Abhishek-a’n hriattirna siama a tarlan danin August 20, 2020-a General Election to Village Council lo awm turah kan aiawh tur thlanga vote thlak chu mitin chanvo a ni tih tarlangin, Vote thlak tura Mizoram chhung hmundang atanga lo haw duhte chu COVID-19 vei emaw, rinhlelhawm emaw an nih loh chuan vote thlak phalsak tur a ni tih a tarlang a. Inthlanna buaipuitu, Polling Official-te pawh khunghran tur an ni lo tih tarlangin, an hna tha taka an thawh theih nan a tulna apiangah VLTF-in an lo tawiawm tur a ni tih a tarlang a. COVID-19 hri vei nia rinhlelh ni lemlo te khunghran tumna awm palh thei a nih avangin tul lovah mi harsatna siam chiam theih a ni tih pawh tarlangin, RT-PCR/Rapid Antigen Test (RAT) hmanga endik leh finfiah a nih loh phei chuan tul lova inkhung a awm theih thu leh hetiang hi a thlen lohna turin VLTF zawng zawngte COVID-19 hri dona kawngah fimkhur taka hmalâk theuh tur a ni tih a tarlang.

Bawrhsap thuchhuah chuan Mizoram Sawrkarin Mizoram pawn atanga lo kalte chu enkawl dân mumal tak neiin a khunghrang vek tih pawh tarlangin, COVID-19 hri vei an awm a hriat pawhin a enkawlna bik hmunah mumal takin Doctor-ten an enkawl mek thu leh mipui mimir zingah an awm lo tih tarlangin, heng bak hi rinhlelhawm an awm a nih chuan Incident Commander hnenah thlen hmasak tur a ni tih a tarlang a. The Mizoram (Containment and Prevention of COVID-19) Ordinance, 2020-in lei chawi (fine) theihna a sawi leh chawitir theitu ni a a sawi ni lo chuan COVID-19 kaihhnawih thilah Dan-in a sawi ang a nih loh chuan tumah lei chawitir loh tur a nih thu a tarlang a. VLTF-ten mahni Veng leh khua a him theih nana hna an thawh chu a fakawm rualin fimkhur thu-hlaa mahni Veng leh khaw bil huapa lockdown lo puan chuan khawtlang inrelbawlna leh mihring khawsak phung mai bakah District Administration thlengin a nghawng theih avangin mahni veng leh khaw bil tan lockdown hi puan loh tur a ni tih a tarlang a. Heng te hi Village Level Task Force ten an zawm tura duan a nih thu a tarlang bawk a ni.