Serchhip District Hospital-a hman tur TrueNat Quattro RT-PCR a rawn thleng tawh

COVID-19 hri leng mekah Serchhip-a Swab Sample enfiahna tur khawl, TrueNat Quattro RT-PCR chu niminpiah khan Serchhip rawn phurh thlen niin tun thla chhung chuan hman theih tura peihfel hman a ni mai thei nia thudawn a ni.

Mizoram sawrkar in COVID-19 hri leng mek avanga District hrang hranga Sample enfiah a nih theihna tura TrueNat Quattro RT-PCR khawl a lei thar ah hian Serchhip District Hospital-a hman tur khawl chu niminpiah khan Serchhip rawn phurthlen niin Serchhip CMO Conference Hall-ah dah mek a ni a, he khawl in a kentel, Biosafety Levels-2 (BSL) pawh nimin khan Mizoram rawn phurh thlen niin hun reilote ah Serchhip rawn phurh thlen leh beisei a ni bawk.

He khawl dahna tur, Laboratory pawh tunah hian Serchhip District Hospital-a OPD Building-ah buaipui mek niin he hna thawktute chuan karleh Thawhlehni-ah chuan peihfel hman an beisei tih an sawi a, he building hi peihfel a nih hnuah Engineer te rawn kalin TrueNat khawl hi install a ni anga, hemi hnu hian ICMR ten enfiah lehin heta pawm theih a nih chuan hman zui theih a ni dawn a ni. TrueNat khawl hi Doctor pakhat leh Lab. Technician pahnih (2) bakah Data Entry Operator pakhat ten an enkawl tur a ni dawn a, tunah hian Lab. Technician leh Data Entry Operator te hian Training nei tawhin hna thawk thei turin an inpeih tawh a ni.

TrueNat khawl bunna tura Laboratory siam mekah hian thawktute inthlakna hmasa tur siam niin Sample lo dahkhawmna tur a awm bawk a, Sample enfiahna tur hmun bakah Computer Room pawh ruahman niin he Laboratory-a hna thawk ten fimkhur taka an intihfaina tur hmun pawh siam a ni bawk a, Online UPS pawh dah tura ruahman niin Vawiin ah tihfel hman beisei a ni bawk.

Serchhip-a TrueNat khawl bun turah hian tumkhat ah Sample 4 en theih a ni dawn a, Sample pakhat en chhung hi darkar khat chuang te niin nikhat ah Sample 25-30 vel enfiah hman tura ngaih a ni a, he khawl hi COVID-19 hri leng meka Sample enfiahna atan mai bakah natna chi hrang hrang enfiahna atan pawh hman zui theih tura ngaih a ni.